মাদক দ্ৰব্যৰ বিৰুদ্ধে চলোৱা এক যুটীয়া অভিযানত প্ৰায় ৩.৫ কোটি টকাৰ হেৰ’ইন জব্দ কৰিলে অসম ৰাইফলছ আৰু কাছাৰ আৰক্ষীয়ে। কাছাৰ জিলাৰ কালাইনৰ সমীপৰ বুৰুঙা গাঁৱত চলোৱা এই অভিযানত হেৰ’ইনখিনিৰ সৈতে পাঁচজন সৰবৰাহকাৰীকো কৰায়ত্ত কৰা হয়। গোপন সূত্ৰৰ তথ্যৰ ভিত্তিত যোৱা ৭ মাৰ্চত চলোৱা এই সফল অভিযানৰ জৰিয়তে আন্তঃৰাষ্ট্ৰীয় ড্ৰাগছ সৰবৰাহকাৰী চক্ৰৰ এটা বৃহৎ ষড়যন্ত্ৰ নসাৎ কৰিবলৈ সক্ষম হৈছে নিৰাপত্তা বাহিনী।
অসম ৰাইফলছে ছচিয়েল মিডিয়াযোগে জনোৱা অনুসৰি, জব্দ কৰা এই নিষিদ্ধ হেৰ’ইনখিনি মেঘালয়লৈ সৰবৰাহ কৰাৰ পৰিকল্পনা কৰিছিল দুষ্কৃতিকাৰীকেইজনে। অভিযানকাৰী দলে হেৰ’ইনখিনিৰ উপৰি ড্ৰাগছ কঢ়িয়াই অনা দুখন বাহন আৰু সৰবৰাহকাৰীৰ হাতত থকা কেইবাটাও ম’বাইল ফোনো জব্দ কৰিবলৈ সক্ষম হয়। বৰ্তমান ধৃত পাঁচোটা সৰবৰাহকাৰীক পৰৱৰ্তী আইনী প্ৰক্ৰিয়াৰ বাবে কাছাৰ আৰক্ষীৰ হাতত গতাই দিয়া হৈছে।
অঞ্চলটোত বৃদ্ধি পোৱা ড্ৰাগছৰ অবৈধ বেহা ৰোধ কৰিবলৈ নিৰাপত্তা বাহিনীয়ে দীৰ্ঘদিন ধৰি তীক্ষ্ণ নজৰ ৰাখি আহিছে। বিশেষকৈ সীমান্তৱৰ্তী জিলাসমূহক ড্ৰাগছ মুক্ত কৰাৰ লক্ষ্যৰে অসম আৰক্ষী আৰু অসম ৰাইফলছে একত্ৰিতভাৱে ধাৰাবাহিক অভিযান চলাই আছে। আৰক্ষীৰ প্ৰাৰম্ভিক তদন্তত এই চক্ৰটোৰ সৈতে বহিঃৰাজ্যৰ আন ড্ৰাগছ মাফিয়াৰ সম্পৰ্ক থকাৰ সন্দেহ প্ৰকাশ কৰা হৈছে।
নিৰ্বাচনৰ প্রাকক্ষণত নিৰাপত্তা ব্যৱস্থা কটকটীয়া কৰি তোলাৰ মাজতে উদ্ধাৰ হোৱা এই বৃহৎ পৰিমাণৰ মাদক দ্ৰব্যই বিশেষ তাৎপৰ্য বহন কৰিছে। কাছাৰ আৰক্ষীয়ে বৰ্তমান সৰবৰাহকাৰীকেইজনক জেৰা চলাই এই চক্ৰটোৰ শিপা বিচাৰি অভিযান অব্যাহত ৰাখিছে। নিৰাপত্তা বাহিনীৰ এই সফলতাই অঞ্চলটোৰ সচেতন মহলৰ মাজত যথেষ্ট প্ৰশংসা বুটলিছে।
About the Author
