অসম বিধানসভা নিৰ্বাচনৰ দিন চমু চাপি অহাৰ লগে লগে ৰাজ্যৰ ৰাজনীতিত এতিয়া আৰম্ভ হৈছে তীব্ৰ দল-বাগৰা খেলৰ। নিৰ্বাচনৰ প্ৰাকমুহূৰ্তত বিৰোধী কংগ্ৰেছক মোক্ষম আঘাত হানি দলটোৰ তিনিগৰাকী নিলম্বিত বিধায়কে শনিবাৰে আনুষ্ঠানিকভাৱে ভাৰতীয় জনতা পাৰ্টিত যোগদান কৰে। ৰাজ্যিক বিজেপিৰ সভাপতি দিলীপ শইকীয়াৰ উপস্থিতিত গুৱাহাটীস্থিত দলীয় কাৰ্যালয়ত কমলাক্ষ দে’ পুৰকায়স্থ, বসন্ত দাস আৰু শশীকান্ত দাসে গেৰুৱা বসন পিন্ধি গেৰুৱা বাহিনীৰ শক্তি বৃদ্ধি কৰে।
প্ৰদেশ কংগ্ৰেছৰ প্ৰাক্তন সভাপতি ভূপেন কুমাৰ বৰাই যোৱা মাহত বিজেপিত যোগদান কৰাৰ পাছত এই তিনিগৰাকী বিধায়কৰ পদক্ষেপে শতিকা পুৰণি দলটোক নিৰ্বাচনৰ পূৰ্বে যথেষ্ট শলঠেকত পেলাইছে। কংগ্ৰেছ ত্যাগ কৰা এই নেতাসকলে বিজেপিৰ মতাদৰ্শৰ প্ৰতি সমৰ্থন জনোৱা বুলি কেন্দ্ৰীয় ৰাজ্যিক মন্ত্ৰী পবিত্ৰ মাৰ্ঘেৰিটাই মন্তব্য কৰে। সাংবাদিকৰ আগত মাৰ্ঘেৰিটাই কয়, “বিজেপিৰ নীতি আৰু কৰ্মৰাজিক সঁহাৰি জনাই আজি বিভিন্ন দলৰ নেতা-কৰ্মীয়ে আমাৰ সৈতে একাত্ম হৈছে।”
ইফালে, কংগ্ৰেছে ঘোষণা কৰা ৪২ জনীয়া প্ৰথমখন প্ৰাৰ্থী তালিকাক লৈও শাসকীয় পক্ষই তীব্ৰ বাক্যবাণ নিক্ষেপ কৰিছে। মুখ্যমন্ত্ৰী ডঃ হিমন্ত বিশ্ব শৰ্মাই এই তালিকাক ‘পৰিয়ালবাদৰ তালিকা’ বুলি অভিহিত কৰি সমালোচনা কৰে। তেওঁ লগতে কয়, “কংগ্ৰেছৰ তালিকাত কেৱল পৰিয়ালবাদৰ প্ৰতিফলন ঘটিছে, কিন্তু বিজেপিৰ তালিকাত তৃণমূল পৰ্যায়ৰ কৰ্মীয়েহে স্থান লাভ কৰিব।” আনহাতে পবিত্ৰ মাৰ্ঘেৰিটাৰ মতে, কংগ্ৰেছৰ এই তালিকাত কোনো নতুনত্ব নাই আৰু ৰাইজে আগতেই নাকচ কৰা মুখবোৰকহে পুনৰ প্ৰক্ষেপ কৰা হৈছে।
উল্লেখনীয় যে, কংগ্ৰেছৰ এই তালিকাত গৌৰৱ গগৈ, ৰিপুণ বৰা, দেৱব্ৰত শইকীয়া আৰু মীৰা বৰঠাকুৰ গোস্বামীৰ দৰে জ্যেষ্ঠ নেতাৰ নাম অন্তৰ্ভুক্ত আছে। নন্দিতা দাস আৰু পল্লৱী শইকীয়া গগৈসহ তিনিগৰাকী মহিলাইও এই তালিকাত স্থান লাভ কৰিছে। বিৰোধী মিত্ৰজোঁটৰ এই প্ৰত্যাহ্বানৰ মাজতে একেৰাহে তৃতীয়বাৰৰ বাবে দিছপুৰ দখলৰ লক্ষ্যৰে বিজেপি নেতৃত্বাধীন এন ডি এ এতিয়া নিৰ্বাচনী যুঁজত সম্পূৰ্ণ সাজু হৈ উঠিছে।
About the Author
