২০ মে’ত অনুষ্ঠিত হোৱা পঞ্চম পৰ্যায়ৰ লোকসভা নিৰ্বাচনৰ বাবে মুঠ ৬২.২০ শতাংশ ভোটদান পঞ্জীভুক্ত হয়। নিৰ্বাচন আয়োগে বৃহস্পতিবাৰে সংশোধিত পৰিসংখ্যা প্ৰকাশ কৰে। আয়োগৰ মতে, পঞ্চম পৰ্যায়ত পুৰুষতকৈ অধিক মহিলাই ভোটদান কৰিছিল। নিৰ্বাচন আয়োগে জাৰি কৰা এক বিবৃতি অনুসৰি, ৬৩ শতাংশ মহিলা ভোটাৰৰ তুলনাত ৬১.৪৮ শতাংশ পঞ্জীভুক্ত পুৰুষ ভোটাৰ ভোটকেন্দ্ৰত উপস্থিত হৈছিল।
লোকসভা নিৰ্বাচনৰ পঞ্চম পৰ্যায়ত, ছয়খন ৰাজ্য আৰু দুখন কেন্দ্ৰীয় শাসিত অঞ্চলৰ ৪৯ খন আসনত ভোটদান অনুষ্ঠিত হৈছিল, য’ত ৮.৯৫ কোটিৰো অধিক লোকে ভোটদান কৰিবলৈ যোগ্য আছিল। যাৰ ভিতৰত আছিল ৪.৬৯ কোটি পুৰুষ, ৪.২৬ কোটি মহিলা আৰু তৃতীয় লিংগৰ ৫৪০৯জন ভোটাৰ।
বিহাৰ, ঝাৰখণ্ড, লাডাখ, উৰিষ্যা আৰু উত্তৰ প্ৰদেশত ভোটদান প্ৰক্ৰিয়াত পুৰুষতকৈ মহিলাৰ অংশগ্ৰহণ অধিক আছিল। বিহাৰ আৰু ঝাৰখণ্ডত পুৰুষ-মহিলাৰ ভোটদানৰ শতাংশৰ পাৰ্থক্য যথেষ্ট বেছি আছিল। বিহাৰত, য’ত ৫২.৪২ শতাংশ যোগ্য পুৰুষ ভোটাৰে ভোটদান কৰিছিল, মহিলাসকলৰ মাজত ভোটদানৰ হাৰ আছিল ৬১.৫৮ শতাংশ। একেদৰে, ঝাৰখণ্ডত, ৫৮.০৮ শতাংশ পুৰুষে ভোটদান কৰিছিল আৰু মহিলাসকলৰ মাজত ভোটদানৰ হাৰ আছিল ৬৮.৬৫।
