বিহাৰৰ ১৩ বছৰীয়া বৈভৱ সূৰ্যবংশী আই পি এল দলত যোগদান কৰা আটাইতকৈ কম বয়সীয়া খেলুৱৈ হিচাপে পৰিগণিত হৈছে। তেওঁক ৰাজস্থান ৰয়েলছে মেগা নিলামত ১.১০ কোটি টকাত ক্ৰয় কৰিছে। নিলামত সূৰ্যবংশীৰ আধাৰ মূল্য আছিল ৩০ লাখ টকা আৰু দিল্লী কেপিটেলছে প্ৰথম নিবিদা কৰিছিল। ৰাজস্থানে দিল্লীক অতিক্ৰম কৰি এই খেলুৱৈজনক ক্ৰয় কৰে।
তেওঁ শেহতীয়াকৈ চেন্নাইত অষ্ট্ৰেলিয়া অনুৰ্ধ-১৯ দলৰ বিৰুদ্ধে ভাৰতৰ অনুৰ্ধ-১৯ দলৰ হৈ যুৱ টেষ্টত শতক অৰ্জন কৰিছিল আৰু তেওঁ এই কৃতিত্ব লাভ কৰা আটাইতকৈ কম বয়সীয়া খেলুৱৈও হৈছিল। সূৰ্যবংশীয়ে সেই খেলখনত ৬২ টা বলত ১০৪ ৰান সংগ্ৰহ কৰিছিল।
অৱশ্যে, এই বছৰ জানুৱাৰীত ৰঞ্জী ট্ৰফীৰ আত্মপ্ৰকাশৰ আগতে সূৰ্যবংশীৰ প্ৰকৃত বয়স বিতৰ্কিত হৈছিল, যেতিয়া যোৱা বছৰ তেওঁৰ এটা ভিডিঅ’ সাক্ষাৎকাৰ ভাইৰেল হৈছিল, য’ত তেওঁ কৈছিল যে ২০২৩ চনৰ ছেপ্টেম্বৰত তেওঁৰ বয়স ১৪ বছৰ হ’ব। তেওঁৰ বয়স কিমান বুলি সোধাত সূৰ্যবংশীয়ে কয়-২০২৩ চনৰ ২৭ ছেপ্টেম্বৰত মই ১৪ বছৰ সম্পূৰ্ণ কৰিম।
