ডিজিটেল ডেস্কঃ পঞ্জাৱৰ শ্ৰী কিৰাটপুৰ চাহিবৰ সমীপত সংঘটিত এক কৰুণ ঘটনাই শোকৰ ছাঁ পেলাইছে সমগ্ৰ অঞ্চলটোত।
ৰে’লপথৰ সমীপত খেলি থকা সময়তে তীব্ৰবেগী ৰে’লৰ খুন্দাত দেওবাৰে মৃত্যু ঘটে ৩ টাকৈ শিশুৰ।
জানিব পৰা মতে, দেওবাৰে পুৱাৰ ভাগত ৪টা শ্ৰমিক শিশুৱে কিৰাটপুৰ চাহিবৰ ছতলেজ নদীৰ ওপৰত থকা এখন দলঙৰ সমীপৰ ৰে’লপথত খেলি আছিল।
সেই সময়তে অহা এখন তীব্ৰবেগী যাত্ৰীবাহী ৰে’লে শিশু কেইটিক খুন্দা মৰাত তিনিটা শিশুৰ ঘটনাস্থলীতে মৃত্যু ঘটে।
ইফালে আহত আনটি শিশুক ৰে’ল আৰক্ষীয়ে উদ্ধাৰ কৰি হাস্পতাললৈ প্ৰেৰণ কৰে।
নিহত শিশু কেইটিৰ আটাইকেইটাৰ বয়স ৭ বছৰৰ পৰা ১৩ বছৰৰ ভিতৰত হ’ব বুলি জানিবলৈ দিয়ে আৰক্ষীয়ে।
এই শোকাবহ ঘটনাই অঞ্চলটোত শোকৰ ছাঁ পেলাইছে।
ইফালে পঞ্জাৱৰ প্ৰাক্তন মুখ্যমন্ত্ৰী অমৰিন্দৰ সিঙে নিহত শিশু কেইটিৰ পৰিয়াললৈ আৰ্থিক ক্ষতিপূৰণ প্ৰদানৰ বাবে চৰকাৰক দাবী জনাইছে।
অন্যহাতে ৰাজ্য চৰকাৰেও এই ঘটনাৰ তদন্তৰ নিৰ্দেশ দিছে।
