যোৱা ১৮ ছেপ্টেম্বৰৰ পৰা নিৰুদ্দেশ হৈ থকা পুনেৰ বাৱধানৰ এজন কিশোৰক শুকুৰবাৰে বিয়লি সতৰা জিলাৰ খাম্বটকী সুৰংগৰ সমীপত মৃত অৱস্থাত উদ্ধাৰ কৰা হয়।
সতৰা আৰক্ষীয়ে নিহত কিশোৰজনক বাৱধানৰ নিবাসী ধ্ৰুৱ স্বপ্নিল সোণোৱানে (১৮) বুলি চিনাক্ত কৰিছে। তেওঁৰ মটৰ চাইকেলখনো ক্ষতিগ্ৰস্ত অৱস্থাত সেই স্থানতে উদ্ধাৰ হয়। বিষয়াসকলে সন্দেহ কৰিছে যে সুৰংগটোৰ সমীপত সংঘটিত পথ দুৰ্ঘটনাত ধ্ৰুৱৰ মৃত্যু হৈছে।
আৰক্ষীয়ে জনোৱা মতে, ধ্ৰুৱৰ পৰিয়াল গণেশ উৎসৱৰ বাবে জলগাঁৱৰ জন্মস্থানলৈ গৈছিল আৰু তেওঁ ঘৰত অকলে আছিল। যেতিয়া তেওঁলোকে মোবাইল ফোনযোগে তেওঁৰ সৈতে যোগাযোগ কৰিব নোৱাৰিলে, তেতিয়া তেওঁলোকে কিশোৰজনক বিচাৰিবলৈ আৰম্ভ কৰিলে। ইয়াৰ পিছতে তেওঁৰ আত্মীয়ই হিঞ্জেৱাড়ী থানাত নিৰুদ্দেশৰ ৰিপৰ্ট দাখিল কৰে।
নিজৰ বাসগৃহৰ সমীপৰ চিচিটিভি কেমেৰা পৰীক্ষা কৰি দেখা যায় যে ১৮ ছেপ্টেম্বৰৰ পুৱাই মটৰ চাইকেলেৰে ঘৰৰ পৰা ওলাই আহিছিল ধ্ৰুৱ। যোৱা পাঁচ দিন ধৰি আৰক্ষীৰ দলে তেওঁক বিচাৰি ফুৰাৰ সময়তো খাম্বটকী সুৰংগৰ সমীপত ঘাঁহ কাটি থকা একাংশ লোকে মটৰ চাইকেলখন উদ্ধাৰ কৰি আৰক্ষীক অৱগত কৰে।
ইয়াৰ পিছতে আৰক্ষীয়ে ঘটনাস্থলীত উপস্থিত হৈ ধ্ৰুৱৰ মৃতদেহটো উদ্ধাৰ কৰে। প্ৰাথমিক তদন্তত এয়া দুৰ্ঘটনা বুলি সন্দেহ কৰিছে আৰক্ষীয়ে।
আৰক্ষীৰ সন্দেহ প্ৰকাশ কৰিছে ধ্ৰুৱই সতৰাৰ কিছু ঠাই ভ্ৰমণ কৰি অকলে মটৰ চাইকেলেৰে পুনেলৈ উভতি অহাৰ সময়ত খাম্বটকী সুৰংগৰ সমীপত কোনোবা অচিনাক্ত বাহনৰ সৈতে সংঘৰ্ষ হয়। মৃত্যুৰ আঁৰৰ সঠিক কাৰণ নিশ্চিত কৰিবলৈ তদন্ত চলি আছে বুলি তেওঁলোকে জনায়।
