বলিউড অভিনেত্ৰী জেকলিন ফাৰ্ণাণ্ডেজক আজি ই ডিয়ে প্ৰবঞ্চক সুকেশ চন্দ্ৰশেখৰৰ সৈতে জড়িত এক ২০০ কোটি টকাৰ মানি লন্ডৰিং গোচৰত সোধা-পোছা কৰিব। ২০০ কোটি টকাৰ প্ৰৱঞ্চনাৰ গোচৰত কেন্দ্ৰীয় তদন্তকাৰী সংস্থাটোৱে দ্বিতীয়বাৰৰ বাবে ৩৬ বছৰীয়া অভিনেত্ৰী গৰাকীক সোধা পোছা কৰিব।
উল্লেখ্য যে, সুকেশ চন্দ্ৰশেখৰৰ বিৰুদ্ধে ৰেনবেক্সিৰ প্ৰাক্তন প্ৰচাৰক শিবিন্দৰ সিং আৰু মালবিন্দৰ সিঙৰ পৰিয়ালক ২০০ কোটি টকাৰ প্ৰতাৰণা কৰাৰ অভিযোগ আছে। ২৪ আগষ্টত তদন্ত সংস্থাটোৱে কৈছিল যে চন্দ্ৰশেখৰৰ বিৰুদ্ধে ধন প্ৰবঞ্চনাৰ গোচৰৰ সন্দৰ্ভত চেন্নাইত এটা বিলাসী বাংলো, ৮২.৫ লাখ টকা নগদ ধন আৰু এক ডজনৰো অধিক বিলাসী গাড়ী জব্দ কৰা হৈছে।
এই গোচৰটো তেওঁৰ আৰু আনসকলৰ বিৰুদ্ধে অপৰাধমূলক ষড়যন্ত্ৰ, প্ৰৱঞ্চনা আৰু প্ৰায় ২০০ কোটি টকাৰ ধন দাবীৰ অভিযোগত দিল্লী আৰক্ষীৰ অৰ্থনৈতিক অপৰাধ শাখাৰ এজাহাৰৰ ওপৰত আধাৰিত।
“সুকেশ চন্দ্ৰশেখৰ হৈছে এই প্ৰৱঞ্চনাৰ মূল সূত্ৰধাৰ। তেওঁ ১৭ বছৰ বয়সৰ পৰা অপৰাধ জগতৰ অংশ হৈ আছে। তেওঁৰ বিৰুদ্ধে একাধিক এজাহাৰ আছে আৰু বৰ্তমান ৰোহিণী কাৰাগাৰত বন্দী হৈ আছে,” প্ৰৱৰ্তন সঞ্চালকালয়ে যোৱা সপ্তাহৰ অভিযানৰ পিছত বিবৃতিটোত কয়।
অনুসন্ধানৰ সময়ত উদ্ধাৰ হোৱা প্ৰমাণৰ ওপৰত আধাৰিত কৰি, তদন্ত সংস্থাটোৱে জেকলিন ফাৰ্ণাণ্ডেজক দ্বিতীয়বাৰৰ বাবে মাতি পঠিয়াইছে। যোৱা মাহত অভিনেতৃগৰাকীক প্ৰায় পাঁচ ঘণ্টা ধৰি সোধা-পোছা কৰা হৈছিল।
বাতৰি অনুসৰি সেই সময়ছোৱাত কাৰাগাৰত বন্দী হৈ থকা সুকেশ চন্দ্ৰশেখৰে কল আৰু বাৰ্তাৰ জৰিয়তে জেকলিনৰ সৈতে নিয়মীয়া যোগাযোগত আছিল আৰু সংস্থাটোৱে তেওঁক এই সন্দৰ্ভতে পুনৰ প্ৰশ্ন কৰিব বিচাৰে।
