উচ্চতম ন্যায়ালয়ে অনুচ্ছেদ ৩৭০ গোচৰৰ শুনানি সম্পূৰ্ণ কৰিছে। মুখ্য ন্যায়াধীশৰ নেতৃত্বত পাঁচজনীয়া সংবিধান বিচাৰপীঠে দুয়োপক্ষৰ যুক্তি ১৬ দিনৰ বাবে শুনানি গ্ৰহণ কৰি মঙলবাৰে ৰায় সংৰক্ষিত ৰাখে। শুনানি চলি থকাৰ মাজতে উত্তপ্ত হৈ পৰিছিল যেতিয়া আদালতে মুখ্য আবেদনকাৰী মহম্মদ আকবৰ লোনৰ পৰা শপতনামা বিচাৰিছিল যে তেওঁ জম্মু আৰু কাশ্মীৰক ভাৰতৰ এক অবিচ্ছেদ্য অংগ বুলি বিবেচনা কৰে। উল্লেখ্য যে ২০১৯ৰ ৫ আগষ্টত সংসদে অনুচ্ছেদ ৩৭০-ৰ অধীনত জম্মু আৰু কাশ্মীৰক প্ৰদান কৰা বিশেষ মৰ্যাদা বাতিল কৰাৰ বাবে এক প্ৰস্তাৱ গৃহীত কৰে। ৰাজ্যখনক জম্মু আৰু কাশ্মীৰ আৰু লাডাখ দুটা কেন্দ্ৰীয় শাসিত অঞ্চলত বিভক্ত কৰাৰ সিদ্ধান্ত লোৱা হৈছিল। এই সিদ্ধান্তটো ২০ খন আবেদনৰ জৰিয়তে উচ্চতম ন্যায়ালয়ত প্ৰত্যাহ্বান জনোৱা হৈছিল। বিষয়টো মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত এখন সংবিধান বিচাৰপীঠে শুনানি গ্ৰহণ কৰে। উল্লেখ্য যে গোচৰটোৰ প্ৰথম দুজন আবেদনকাৰী – শ্বাহ ফেচল আৰু শ্বেহলা ৰছিদে শুনানি আৰম্ভ হোৱাৰ আগতেই তেওঁলোকৰ আবেদন উঠাই লয়। সেয়েহে, আদালতে তেওঁলোক দুয়োজনৰ নাম আবেদনকাৰীৰ তালিকাৰ পৰা আঁতৰাবলৈ নিৰ্দেশ দিছিল। ইয়াৰ পিছত, নেচনেল কনফাৰেন্সৰ সাংসদ মহম্মদ আকবৰ লোনৰ নাম আবেদনকাৰীৰ তালিকাত প্ৰথম স্থানত থাকে। জ্যেষ্ঠ অধিবক্তা কপিল চিব্বল লোনৰ হৈ উপস্থিত হৈছিল। তেওঁৰ উপৰিও, ৰাজীৱ ধাৱান, গোপাল সুব্ৰমনিয়াম, জাফৰ শ্বাহৰ দৰে বহুজ্যেষ্ঠ অধিবক্তাই অনুচ্ছেদ ৩৭০ বাতিল কৰাৰ সিদ্ধান্ত প্ৰত্যাখ্যান কৰিবলৈ দাবী জনাইছিল। গতিকে, ই এক বেলেগ স্থিতি লাভ কৰিছিল। ৰাজ্যখনত এখন পৃথক সংবিধান সভা আছিল, যাৰ কাম ১৯৫৭ চনত সম্পূৰ্ণ হৈছিল। ভাৰতৰ সংবিধানৰ পৰা অনুচ্ছেদ ৩৭০ আঁতৰোৱাৰ সিদ্ধান্ত কেৱল জম্মু আৰু কাশ্মীৰৰ সংবিধান সভাৰ সন্মতিতহে লোৱা হ’ব পাৰে। সেয়েহে, সংসদৰ সিদ্ধান্ত আইনগতভাৱে ভুল। সংবিধান বিচাৰপীঠৰ বিচাৰকসকলে আবেদনকাৰী পক্ষৰ এই যুক্তিৰ সৈতে একমত হোৱা নাছিল। তেওঁলোকে কয় যে ১৯৫৭ চনত জম্মু-কাশ্মীৰৰ সংবিধানসভা সমাপ্ত হয়। কিন্তু ইয়াৰ অৰ্থ এইটো নহয় যে অনুচ্ছেদ ৩৭০ ক কেৱল ইয়াৰ বাবে স্থায়ী বুলি গণ্য কৰা উচিত। তেওঁলোকে কয়-এয়া সঁচা যে সংসদই ৰাজ্যখনৰ কিছুমান বিষয়ত আইন প্ৰণয়ন কৰিব নোৱাৰিলে, কিন্তু ই ভাৰতৰ সৈতে জম্মু-কাশ্মীৰৰ সম্পৰ্কক প্ৰভাৱিত নকৰে। ভাৰতত যোগদানৰ অৰ্থ হৈছে যে জম্মু আৰু কাশ্মীৰে ভাৰতৰ ওচৰত নিজৰ সাৰ্বভৌমত্ব সমৰ্পণ কৰিছে।
About the Author
