সৰুপথাৰত নিৰ্বাচনী বতাহ শাম কটাৰ লগে লগে এতিয়া বিহুৰ প্ৰস্তুতিত ব্যস্ত হৈ পৰিছে লোকসকল। সৰুপথাৰৰ টেঙাহোলা গাঁৱত পোনপ্ৰথমবাৰৰ বাবে সপ্তাহজোৰাকৈ আয়োজন কৰছে বিহু কৰ্মশালাৰ। বৃহস্পতিবাৰৰ পৰা আৰম্ভ হৈছে এই কৰ্মশালাৰ। পোন প্ৰথমবাৰৰ বাবে টেঙাহোলা গাঁৱত বিহু কৰ্মশালা অনুষ্ঠিত হোৱা বাবে উৎফুল্লিত হৈ পৰিছে গাঁৱবাসী। এই কৰ্মশালাত প্ৰশিক্ষণ দিয়া হ’ব বিহু-নৃত্য, ঢোল আৰু পেঁপাৰ৷ বিহু নৃত্যৰ প্ৰশিক্ষক ৰীতামণী বৰা শইকীয়া, ঢোলৰ প্ৰশিক্ষক জীতেন বৰা (ওজা), আৰু পেঁপাৰ প্ৰশিক্ষক হিচাপে উপস্থিত আছে অজয় বৰা। এই কৰ্মশালাত আশা কৰাতকৈও অধিক প্ৰশিক্ষাৰ্থীয়ে যোগদান কৰিছে বুলি জানিবলৈ দিয়ে। এই কৰ্মশালাৰ পৰা নৱ প্ৰজন্মৰ যুৱক-যুৱতীসকল যথেষ্ট পৰিমাণে উপকৃত হ’ব বুলি মন্তব্য কৰিছে আয়োজক সমিতিয়ে।
