উত্তৰ প্ৰদেশৰ লখিমপুৰ খেৰী জিলাত বুধবাৰে পুৱা এখন অভাৰলোড ট্ৰাক এখন ব্যক্তিগত বাছত খুন্দা মৰাৰ ফলত ১০ জন লোকৰ মৃত্যু হয়।
ৰাষ্ট্ৰীয় ঘাইপথ ৭৩০ৰ পিলিভীত-বস্তি পথৰ এৰা দলঙত সংঘটিত হৈছে এই ঘটনা।
আৰক্ষীৰ মতে, চিকিৎসালয়লৈ স্থানান্তৰিত কৰাৰ সময়ত ৮ জন যাত্ৰী থিতাতে নিহত হোৱাৰ বিপৰীতে আন দুজনৰ চিকিৎসালয়ত মৃত্যু ঘটে।
অতিৰিক্ত জিলা দণ্ডাধীশ সঞ্জয় কুমাৰ সিঙে জনোৱা মতে, বাছখনত মুঠ ৪৫ গৰাকী যাত্ৰী যাত্ৰা কৰি থকাৰ লগতে ১৮ জন গুৰুতৰভাৱে আহত হৈছে।
দুৰ্ঘটনাৰ সময়ত বাছ চালক আমিৰে চলি থকা বাছৰ পৰা জপিয়াই নিজৰ জীৱন ৰক্ষা কৰিবলৈ সক্ষম হোৱাৰ বিপৰীতে বাছ কণ্ডাক্টৰজন গুৰুতৰভাৱে আহত হয়। এতিয়ালৈকে নিহত চাৰিজন যাত্ৰীৰ নাম হৈছে আলিমুন(৫০), সগীৰ(৪৫), মন্নু(১৪) আৰু সুৰেন্দ্ৰ(৪২)।
তথ্য লাভ কৰাৰ লগে লগে লক্ষ্ণৌৰ সংমণ্ডল আয়ুক্ত ৰোষণ জেকবে ঘটনাৰ বুজ ল’বলৈ চিকিৎসালয়ত উপস্থিত হয়।
পথ দুৰ্ঘটনাৰ পিছতে ঘাইপথটোত ৮ কিলোমিটাৰ পৰ্যন্ত ব্যাপক যান-জঁটৰ সৃষ্টি হয়।
প্ৰত্যক্ষদৰ্শীয়ে জনোৱা মতে, অভাৰলোড ট্ৰাক চালকে গাড়ীখনৰ টায়াৰ ফাটি বিপৰীত দিশৰ পৰা অহা ব্যক্তিগত বাছখনত খুন্দা মৰাৰ ফলত গাড়ীখনৰ ওপৰত নিয়ন্ত্ৰণ হেৰুৱাই পেলায়।
মুখ্যমন্ত্ৰী যোগী আদিত্যনাথে শোক প্ৰকাশ কৰি জ্যেষ্ঠ বিষয়াসকলক হেঁচা প্ৰয়োগ কৰি আহত যাত্ৰীসকলক পৰ্যাপ্ত চিকিৎসা প্ৰদান কৰিবলৈ নিৰ্দেশ দিয়ে।
