গুজৰাটৰ মৰবীত কেবল দলং দেওবাৰে ভাঙি কমেও ১৩৪ জন লোকৰ মৃত্যু হোৱাৰ পিছতে দলংখন মেৰামতি কৰা অৰেভা গ্ৰুপৰ দুজন মেনেজাৰকে ধৰি ৯জন লোকক গ্ৰেপ্তাৰ কৰিছে আৰক্ষীয়ে।
সোমবাৰে ৰাজকোট ৰেঞ্জৰ আই জি অশোক যাদৱে এক সংবাদমেলত কয় যে, ‘গ্ৰেপ্তাৰ হোৱা ৯ জন লোকৰ ভিতৰত দুজন অৰেভা কোম্পানীৰ মেনেজাৰ, দুজন টিকট কেৰাণীৰ লগতে দুজন ঠিকাদাৰ আৰু গাফিলতিৰ বাবে তিনিজন নিৰাপত্তাৰক্ষী আছে।’
ইয়াৰ পূৰ্বে এই দুৰ্ঘটনাৰ পিছত সোমবাৰে আৰক্ষীয়ে ৯ জন লোকক আটক কৰি ৰখা বুলি খবৰ ওলাইছিল। সোধা-পোছাৰ অন্তত আৰক্ষীয়ে গ্ৰেপ্তাৰ কৰে।
যাদৱে লগতে কয়, ‘কালি এটা মৰ্মান্তিক কাণ্ড সংঘটিত হৈছিল, আমি ৩০৪, ৩০৮ আৰু ১০৪ ধাৰাত গাফিলতিৰ বিৰুদ্ধে এফআইআৰ ৰুজু কৰিছিলো।আৰক্ষী আৰু প্ৰশাসনে ক্ষীপ্ৰতাৰে প্ৰতিক্ৰিয়া প্ৰকাশ কৰিছিল।
গুজৰাটৰ মৰ্বি চহৰৰ মাচু নদীত ওলমি থকা দলংখন ভাঙি এতিয়ালৈকে ১৩৪ জন লোকৰ মৃত্যু হোৱাৰ লগতে ১০০ জনৰো অধিক লোক আহত হৈছে। এই সংখ্যা বৃদ্ধি পোৱাৰ সম্ভাৱনা আছে।
ভাঙি পৰাৰ আগৰ মুহূৰ্তবোৰৰ চিচিটিভি কেমেৰাৰ ফুটেজত দেখা গৈছে যে এদল যুৱকে ফটো তুলি থকাৰ বিপৰীতে আন কিছুমানে ওলমি থকা দলংখনক ইফালৰ পৰা সিফাললৈ জোকাৰিবলৈ চেষ্টা কৰিছিল, তাৰ পিছত তেওঁলোকে তলৰ নদীখনত পৰি যায় কাৰণ ইয়াক একেলগে ধৰি ৰখা কেবলবোৰে ঠাই এৰি দিছিল।
আৰক্ষীয়ে সংবাদ সংস্থা ৰয়টাৰ্ছক জনোৱা মতে, দলংখনৰ সংস্কাৰ, ৰক্ষণাবেক্ষণ আৰু পৰিচালনাৰ বাবে দায়বদ্ধ নাম প্ৰকাশ নকৰা লোকৰ বিৰুদ্ধে অপৰাধমূলক গোচৰ ৰুজু কৰাৰ পিছতে তেওঁলোকে এই ৯ জন ব্যক্তিক আটক কৰিছে।
লগতে এই দলংখনত ১০০-১৫০ জন লোকৰ বাবে সক্ষম হোৱা বুলিও কোৱা হৈছে যদিও দেওবাৰে এই দলংখনত ৪০০-৫০০ জন লোক উপস্থিত আছিল।
কেবল দলংখনৰ ৰক্ষণাবেক্ষণ আৰু পৰিচালনাৰ লগত জড়িত সংস্থাসমূহৰ বিৰুদ্ধে হত্যাৰ সমান নহয় দোষী হত্যাৰ অভিযোগত আৰক্ষীয়ে এফআইআৰ ৰুজু কৰিছে।
মৰ্বি পৌৰসভাৰ মুখ্য বিষয়া সন্দীপসিং জালাই সাংবাদিকৰ আগত কয় যে চহৰখনৰ ঘড়ী আৰু ই-বাইক নিৰ্মাতা অৰেভা গ্ৰুপক দলংখনৰ সংস্কাৰ আৰু পৰিচালনাৰ ঠিকা দিয়া হৈছে।
‘বি’ সংমণ্ডল আৰক্ষী পৰিদৰ্শক প্ৰকাশ ডেকিৱাদিয়াই পঞ্জীয়ন কৰা এফআইআৰত মৰ্বি চহৰৰ মাচু নদীৰ ওপৰত থকা দলংখনৰ ৰক্ষণাবেক্ষণৰ বাবে স্থানীয় প্ৰশাসনে ‘ব্যক্তিগত এজেন্সী’ৰ দায়িত্ব অৰ্পণ কৰাৰ বাবে প্ৰায় ৮ মাহ ধৰি ব্যৱহাৰ নোহোৱা বুলি জানিবলৈ দিয়ে। ৰক্ষণাবেক্ষণৰ কাম সম্পূৰ্ণ হোৱাৰ পিছত ২৬ অক্টোবৰত সংস্থাটোৱে জনসাধাৰণৰ বাবে দলংখন মুকলি কৰি দিয়ে বুলি এফআইআৰত প্ৰকাশ। দেওবাৰে সন্ধিয়া প্ৰায় ৬.৩০ বজাত দলংখন ভাঙি নদীত পৰি কেইবাজনো লোকৰ মৃত্যু হয়।
এফআইআৰৰ তথ্য অনুসৰি সংস্থাটোৰ ৰাইজৰ সংবেদনহীন মনোভাৱৰ বাবেই এই ঘটনা সংঘটিত হৈছে। ইয়াত উল্লেখ কৰা হৈছে যে সংশ্লিষ্ট ব্যক্তি বা সংস্থাসমূহে দলংখনৰ ৰক্ষণাবেক্ষণৰ মানদণ্ডৰ লগতে মেৰামতিৰ কামৰ প্ৰতিও গুৰুত্ব নিদিলে। এফ আই আৰত উল্লেখ কৰা হৈছে যে সংস্থাটোৱে মেৰামতি আৰু পৰিচালনাৰ ক্ষেত্ৰত নিজৰ সংবেদনহীন পন্থাৰ ফলত জীৱন হেৰুৱাব পাৰে বুলি জানিও জনসাধাৰণৰ বাবে দলংখন মুকলি কৰি দিছিল।
