বিশ্ব স্বাস্থ্য সংস্থাই মেলেৰিয়া প্ৰতিৰোধ কৰাৰ বাবে এক গুৰুত্বপূৰ্ণ পদক্ষেপ গ্ৰহণ কৰিছে, যাৰ অধীনত এটা নতুন আৰু উন্নত ভেকছিনত অনুমোদন জনাইছে। যাৰ নাম R21//Matrix-M। এই ভেকচিনটো পূৰ্বৰ ভেকছিনবোৰতকৈ কম মূল্যৰ, যাৰ ফলত এই ভেকচিনটো অধিক সংখ্যক লোকক প্ৰদান কৰাটো সম্ভৱপৰ হৈ উঠিব। ভেকচিনৰ ক্ষেত্ৰত কৌশলগত পৰামৰ্শদাতা গোট অফ এক্সপার্টছ (SAGE) আৰু মেলেৰিয়া নীতি উপদেষ্টা গোটৰ (MPAG) এখন বৈঠক ২৫ ৰ পৰা ২৯ ছেপ্টেম্বৰৰ ভিতৰত অনুষ্ঠিত হৈছিল। য’ত এই নতুন ভেকছিনৰ পৰামৰ্শ দিয়া হৈছিল। বিশ্ব স্বাস্থ্য সংস্থাৰ মহানিৰ্দেশকেও ইয়াক সমৰ্থন কৰিছিল। বিশ্ব স্বাস্থ্য সংস্থাই ইয়াৰ পূৰ্বে RTS,S/AS01 নামৰ ভেকছিন এটাৰ পৰামৰ্শ দিছিল। বিশ্ব স্বাস্থ্য সংস্থাৰ মহানিৰ্দেশক ঘেব্ৰেয়েচাছে কৈছিল যে RTS,S/AS01আৰু R21-ৰ মাজত বিশেষ পাৰ্থক্য নাই। দুয়োটা কাৰ্যকৰী। অৱশ্যে, কোনটো অধিক কাৰ্যকৰী সেয়া কোৱা কঠিন। দুয়োটা ভেকছিন শিশুৰ মেলেৰিয়া প্ৰতিৰোধত সুৰক্ষিত আৰু কাৰ্যকৰী বুলি পোৱা গৈছে। উল্লেখ্য যে মেলেৰিয়া হৈছে এটা মহৰ প্ৰজাতিৰ ফলত হোৱা ৰোগ। আফ্ৰিকাৰ অঞ্চলবোৰ আটাইতকৈ বেছি প্ৰভাৱিত হৈছে। এক প্ৰতিবেদন অনুসৰি, এই ৰোগৰ ফলত প্ৰতি বছৰে পাঁচ লাখ শিশুৰ মৃত্যু হয়। মেলেৰিয়াৰ ভেকছিনৰ সমগ্ৰ বিশ্বতে যথেষ্ট চাহিদা আছে। অৱশ্যে, RTS,S/AS01-ৰ যোগান কম। নতুন ভেকছিনৰ আগমনৰ সৈতে, আশা কৰা হৈছে যে ইয়াক পৃথিৱীৰ প্ৰতিটো কোণলৈ প্ৰদান কৰিব পৰা যাব। বিশ্ব স্বাস্থ্য সংস্থাৰ মহানিৰ্দেশক টেড্ৰোছ এডনোম ঘেব্ৰেয়েচাছে এই সন্দৰ্ভত কয়-এজন মেলেৰিয়া গৱেষক হিচাপে, মই সেই দিনটোৰ সপোন দেখিছিলো যেতিয়া আমি মেলেৰিয়াৰ বিৰুদ্ধে এক সুৰক্ষিত আৰু কাৰ্যকৰী ভেকছিন ল’ম। এতিয়া আমাৰ ওচৰত দুটা ভেকছিন আছে। এইটো এটা ডাঙৰ সুখৰ বিষয়। আৰ.টি.এছ./এছ. ভেকছিনৰ চাহিদা যোগানতকৈ যথেষ্ট বেছি, সেয়েহে এই দ্বিতীয় ভেকছিনে শিশুৰ জীৱন ৰক্ষা কৰাত এক গুৰুত্বপূৰ্ণ ভূমিকা পালন কৰিব। বিবিচিৰ প্ৰতিবেদন অনুসৰি, এই ভেকছিনটো অক্সফৰ্ড বিশ্ববিদ্যালয়ৰ দ্বাৰা প্ৰস্তুত কৰা হৈছে। ইয়াক ভাৰত-ভিত্তিক চিৰাম ইনষ্টিটিউট অফ ইণ্ডিয়াই নিৰ্মাণ কৰিব। প্ৰতিষ্ঠানটোৱে প্ৰতি বছৰে ১০০ নিযুত পালি উৎপাদনৰ লক্ষ্য নিৰ্ধাৰণ কৰিছে। এইটো বিশ্বাস কৰা হয় যে এটা পালিৰ মূল্য ১৬৬ টকাৰ পৰা ৩৩২ টকাৰ ভিতৰত হ’ব।
