দেওবাৰে অনুষ্ঠিত হ’বলগীয়া ক্ৰিকেট বিশ্বকাপৰ ফাইনেলত উপস্থিত থাকিব প্ৰধানমন্ত্ৰী নৰেন্দ্ৰ মোডী। দেওবাৰে সন্ধিয়া আহমেদাবাদত উপস্থিত হ’ব প্ৰধানমন্ত্ৰী মোডী। আহমেদাবাদ ক্ৰিকেট ষ্টেডিয়ামত উপস্থিত হৈ ভাৰত আৰু অষ্ট্ৰেলিয়াৰ মাজত বিশ্বকাপৰ ফাইনেল খেল উপভোগ কৰিব। এই সময়ছোৱাত দুই তিনিখন ৰাজ্যৰ মুখ্যমন্ত্ৰীও উপস্থিত থাকিব। দেওবাৰে প্ৰধানমন্ত্ৰী মোডীৰ গুজৰাট ভ্ৰমণৰ সম্পূৰ্ণ সময়সূচী প্ৰকাশ কৰা হৈছে।
আচলতে ভাৰত আৰু অষ্ট্ৰেলিয়াৰ মাজত অনুষ্ঠিত হোৱা বিশ্বকাপৰ অন্তিমখন খেল আহমেদাবাদত অৱস্থিত ‘নৰেন্দ্ৰ মোডী ক্ৰিকেট ষ্টেডিয়াম’ত অনুষ্ঠিত হ’ব। ১.৩ লাখতকৈ অধিক দৰ্শকৰ ক্ষমতা থকা এই ষ্টেডিয়ামখন বিশ্বৰ অন্যতম বৃহৎ ষ্টেডিয়াম। প্ৰধানমন্ত্ৰী মোডীৰ উপৰিও বিচিচিআইৰ বহু গুৰুত্বপূৰ্ণ বিষয়া তথা বৰ্তমানলৈকে বিশ্বকাপ জয় কৰা অধিনায়কসকলো ষ্টেডিয়ামত উপস্থিত থাকিব। ভাৰতীয় ক্ৰিকেট দলৰ ৰূপলৈ চালে বিশ্বকাপ জয়ৰ বাবে ইয়াক শক্তিশালী প্ৰতিদ্বন্দ্বী হিচাপে বিবেচিত হৈছে।
দেওবাৰে সন্ধিয়া প্ৰায় ৪.৩০ বজাৰ পৰা ৫ বজালৈ আহমেদাবাদ বিমানবন্দৰত উপস্থিত হ’ব প্ৰধানমন্ত্ৰী মোডী। ইয়াৰ পূৰ্বে প্ৰধানমন্ত্ৰীয়ে তাৰানগৰ আৰু ৰাজস্থানৰ ঝুনঝুনুত জনসভাত ভাষণ দিব। ৰাজস্থান বিধানসভা নিৰ্বাচনৰ পৰিপ্ৰেক্ষিতত তেওঁ প্ৰথমে ৰাজস্থানত এখন জনসভা সম্বোধন কৰি তাৰ পিছত গুজৰাটলৈ ৰাওনা হ’ব। সন্ধিয়া আহমেদাবাদ বিমানবন্দৰত উপস্থিত হ’ব আৰু তাৰ পিছত পোনে পোনে ৰাজভৱনলৈ ৰাওনা হ’ব। গুজৰাটৰ মুখ্যমন্ত্ৰী ভূপেন্দ্ৰ পেটেল ইয়াত উপস্থিত থাকি তেওঁক আদৰণি জনাব পাৰে।
একে সময়তে ৰাজভৱন পোৱাৰ পিছত বিশ্বকাপৰ ফাইনেল চোৱাৰ সুবিধা অনুযায়ী সন্ধিয়া ৫ বজাৰ পিছত যিকোনো সময়তে ‘নৰেন্দ্ৰ মোডী ক্ৰিকেট ষ্টেডিয়াম’ত উপস্থিত হ’ব প্ৰধানমন্ত্ৰী। বিশ্বকাপৰ ফাইনেলত অসম আৰু মেঘালয়কে ধৰি ৰাজ্যৰ দুইৰ পৰা তিনিগৰাকী মুখ্যমন্ত্ৰীয়েও অংশগ্ৰহণ কৰিব। চূড়ান্ত খেলৰ অন্তত পুনৰবাৰ ৰাজভৱনলৈ যাব প্ৰধানমন্ত্ৰী, য’ত তেওঁ ৰাতিৰ আহাৰ গ্ৰহণ কৰি ৰাতিটো থাকিব। ইয়াৰ পিছত সোমবাৰে গুজৰাটৰ পৰা ৰাজস্থানলৈ যাব নিৰ্বাচনী প্ৰচাৰৰ বাবে প্ৰধানমন্ত্ৰী নৰেন্দ্ৰ মোডী।
