ষ্টাফৰিপৰ্টাৰ, ১৪ জুন : “বিশ্ব ৰক্তদাতা দিৱস” উপলক্ষে দেওবাৰে গুৱাহাটী চিকিৎসা মহাবিদ্যালয় হাস্পতালৰ কণিষ্ঠ চিকিৎসক সন্থাই “ষ্টেট অৱ দ্য আৰ্ট মডেল ব্লাড বেংক”ৰ সহযোগত হাস্পতালখনত মাহেকীয়া ৰক্তদান কাৰ্যসূচী, লোহিতাঞ্জলী ৰ দ্বিতীয় পৰ্যায়টি অনুষ্ঠিত কৰে। ৰক্তদাতা সকলে সক্ৰিয়ভাৱে এই অনুষ্ঠানটিত অংশগ্ৰহণ কৰে। সকলো দাতাৰে ভিতৰত উল্লেখযোগ্য দাতা হ’ল বঙাইগাঁওৰ গায়নচন্দ্ৰ জৈন, যিয়ে এইবাৰ পৰ্যন্ত শতবাৰ ৰক্তদান কৰে। তেওঁক হাস্পতালৰ মুখ্য পৰিচালক তথা গুৱাহাটী চিকিৎসা মহাবিদ্যালয়ৰ অধ্যক্ষ ডাঃ অচ্যুত বৈশ্যই অভিনন্দন জনায়। এই কাৰ্যসূচীয়ে কণিষ্ঠ চিকিৎসক সকলক যথেষ্ট অনুপ্ৰেৰণা যোগায় আৰু হাস্পতালখনৰ কণিষ্ঠ চিকিৎসক সন্থাই ভৱিষ্যতেও এনে শিবিৰৰ আয়োজন কৰি থাকিব বুলি দৃঢ়তা প্ৰদান কৰে।
