নগাঁও জিলাৰ বটদ্ৰৱা প্ৰাথমিক শিক্ষা খণ্ডৰ অন্তৰ্গত বটদ্ৰৱা বৰভেটি প্ৰাথমিক বিদ্যালয়ত মধ্যাহ্ন ভোজন আঁচনিত ব্যাপক দুৰ্নীতি আৰু অনিয়ম সংঘটিত হোৱাৰ গুৰুত্বৰ অভিযোগ উঠিছে ৷ প্ৰাপ্ত অভিযোগ মতে, বিদ্যালয়খনৰ প্ৰধান শিক্ষকজনে চৰম দুৰ্নীতিৰ আশ্ৰয় লৈ আঁচনিখন এক প্ৰকাৰে ভেকো ভাওনাত পৰিণত কৰি তুলিছে ৷ কিয়নো, চৰকাৰে বিদ্যালয়ৰ ছাত্ৰ-ছাত্ৰীসকলক দুপৰীয়াৰ আহাৰ খোৱাবৰ বাবে যি নীতি-নিয়ম আৰোপ কৰি দিছে সেয়া বিদ্যালয়খনৰ প্ৰধান শিক্ষকজনে সম্পূৰ্ণৰূপে অৱজ্ঞা কৰি আহিছে ৷ অভিযোগ অনুসৰি, চৰম মইমতালিৰে প্ৰধান শিক্ষকজনে ছাত্ৰ-ছাত্ৰীসকলক দুপৰীয়া আহাৰৰ নামত কেৱল ভাতৰ লগতে দাইলৰ নামত পানী আৰু কেইডোখৰমান আলুু দিয়েই আভুৱা ভাৰি আহিছে ৷ আচলতে, চৰকাৰী নিৰ্দেশনা অনুসৰি ছাত্ৰ-ছাত্ৰীক দুপৰীয়া আহাৰ হিচাপে নিৰ্দিষ্ট দিনত ভাতৰ লগত দাইল, শাক-পাচলিৰ ভাজি, চয়াবিন, কণী আৰু খিচিৰি খোৱাব লাগে ৷ কিন্তু গুৰু-গোসাঁই নমনা বিদ্যালয়খনৰ প্ৰধান শিক্ষকজনে চৰকাৰী নিৰ্দেশনা মতে ছাত্ৰ-ছাত্ৰীক দুপৰীয়াৰ আহাৰ যোগান নধৰাৰ গুৰুত্বৰ অভিযোগ তুলিছে স্বয়ং অভিভাবকসকলে ৷ হাস্যকৰ কথা যে কেতিয়াবা কণী দুপৰীয়া আহাৰত যোগান ধৰিলেও ৩৫ গৰাকী ছাত্ৰ-ছাত্ৰীৰ মাজত মাত্ৰ ১০ টা কণী ৰান্ধনীৰ হাতত দি সেয়া দাইলত গুড়া ভাজি কৰি মিলাই দিবলৈহে নিৰ্দেশ দিয়ে ৷ যাক লৈ ৰান্ধনীও প্ৰায়েই বিমুৰত পৰিবলগীয়া হয় ৷ সেয়ে প্ৰধান শিক্ষকজনে মধ্যাহ্ন ভোজন আঁচনিৰ ধন উদৰস্থ কৰাৰ মানসেৰে সংঘটিত কৰি অহা এনে চূড়ান্ত অনিয়ম আৰু দুৰ্নীতি ৰুধ কৰাৰ বাবে ছাত্ৰ-ছাত্ৰীৰ অভিভাবক তথা স্থানীয় ৰাইজে শিক্ষা বিভাগৰ উৰ্ধ্বতন কৰ্তৃপক্ষক বিহীত ব্যৱস্থা গ্ৰহনৰ দাবী জনাইছে ৷
