হাইস্কুল শিক্ষান্ত পৰীক্ষাৰ প্ৰশ্নকাকত ফাদিলৰ ঘটনা সন্দৰ্ভত আন এক চাঞ্চল্যকৰ প্ৰকাশ।
ধেমাজি জিলাৰ এজন পৰীক্ষাৰ্থীয়ে পৰীক্ষাৰ তিনিদিন পূৰ্বে গণিত বিষয়ৰ প্ৰশ্নকাকত লাভ কৰা বুলি দাবী কৰিছে।
গণিতৰ প্ৰশ্নকাকত ফাদিল সন্দৰ্ভত সংবাদ মাধ্যমৰ আগত বিতংভাৱে প্ৰকাশ কৰিছে ছাত্ৰজনে।
সংবাদ মাধ্যমৰ সৈতে হোৱা কথা-বতৰাত এইচ এছ এল চিৰ পৰীক্ষাৰ্থীগৰাকীয়ে কয়, ‘এটা হোৱাটছএপ গ্ৰুপৰ জৰিয়তে পৰীক্ষাৰ তিনিদিন আগতে গণিতৰ প্ৰশ্নকাকত লাভ কৰিছিলোঁ। গণিত পৰীক্ষাৰ কেইদিনমান আগতে ‘বন্ধু’ নামৰ হোৱাটছএপ গ্ৰুপ এটাত মোক যোগ দিয়া হৈছিল। গ্ৰুপটোত মুঠ সাতজন ল’ৰা আছিল। তেওঁলোকে মোক প্ৰশ্নকাকতখন ফৰৱাৰ্ড কৰিলে। সেই ল’ৰাকেইটাই মোৰ যোগাযোগ কেনেকৈ পালে মই নাজানো।”
প্ৰাৰ্থীগৰাকীয়ে আৰু উল্লেখ কৰে যে তেওঁ প্ৰশ্নকাকত লাভ কৰাৰ পিছত গ্ৰুপটো ডিলিট কৰা হৈছিল।
তেওঁ কয়, ‘৬ নংৰ পৰা ২১ নং প্ৰশ্নৰ প্ৰশ্নকাকতখনৰ স্নেপশ্বট পাইছিলোঁ। মই যিবোৰ প্ৰশ্ন পাইছিলোঁ সেইবোৰ আছিল সামগ্ৰিকভাৱে ৫০ নম্বৰ। তাৰ পিছত গ্ৰুপটো ডিলিট হৈ গ’ল।”
‘বন্ধু’ গোটৰ অংশ হিচাপে থকা ব্যক্তিসকলৰ ওপৰত মন্তব্য দি এইচ এছ এল চিৰ প্ৰাৰ্থীগৰাকীয়ে কয়, ‘গোটটোত লখিমপুৰ আৰু বকুলগুৰিৰ ল’ৰা আছিল আৰু মই নজনা আন কেইজনমান ল’ৰা আছিল। আচৰিত কথাটো হ’ল, প্ৰশ্নকাকতৰ বিনিময়ত তেওঁলোকে মোৰ পৰা কোনো ধৰণৰ ধন দাবী কৰা নাছিল।”
গ্ৰুপটোৰ ল’ৰাকেইটাই সকলো বিষয়ৰ প্ৰশ্নকাকত থকা বুলি দাবী কৰা বুলিও প্রার্থীগৰাকীয়ে প্রকাশ কৰে৷
যোৱা ৬ মাৰ্চত অনুষ্ঠিত হৈছিল গণিত পৰীক্ষা। সেইদিনাই কাছাৰ জিলাত পৰীক্ষা আৰম্ভ হোৱাৰ ১৫ মিনিটৰ পিছত প্ৰশ্নকাকত ভাইৰেল হোৱাৰ খবৰ আহিছিল। ছ’চিয়েল মিডিয়া প্লেটফৰ্মতো ভাইৰেল হৈছিল প্ৰশ্নকাকতৰ ছবি।
৩ মাৰ্চৰ পৰীক্ষাৰ প্ৰথম দিনটোতে বৰপেটা জিলাৰ পৰা ইংৰাজী বিষয়ৰ প্ৰশ্নকাকত ফাদিল হোৱা বুলি জানিব পৰা গৈছে।
অৱশ্যে ছেবাৰ সম্পাদক তথা পৰীক্ষা নিয়ন্ত্ৰক নৰনাৰায়ণ নাথে সংবাদ মাধ্যমৰ বাতৰিক মিছা আৰু ভিত্তিহীন বুলি অভিহিত কৰিছিল।
