পানামা পেপাৰছ গোচৰত অভিনেত্ৰী ঐশ্বৰ্য ৰায় বচ্চনক চমন জাৰি কৰিছে ইডিয়ে। উল্লেখ্য যে, ইয়াৰ পূৰ্বেও ঐশ্বৰ্য্য ৰায় বচ্চনক এই গোচৰত সোধা পোছাৰ বাবে ইডিয়ে দুবাৰকৈ চমন জাৰি কৰিছিল যদিও অভিনেত্ৰীগৰাকীয়ে তাৰ ওপৰত স্থগিতাদেশ বিচাৰিছিল। ঐশ্বৰ্য্য ৰায় বচ্চনে পানামা পেপাৰছ গোচৰৰ তদন্ত কৰি থকা বিশেষ তদন্ত কাৰী দলটোক স্থগিতৰ আবেদন জনাইছিল।
প্ৰণিধানযোগ্য যে, পানামা পেপাৰছ হৈছে বিশ্বৰ বহুতো ব্যক্তি আৰু কৰ্পোৰেট প্ৰতিষ্ঠানৰ দ্বাৰা প্ৰৱঞ্চনা আৰু কৰ ফাঁকিৰ লিক ডকুমেণ্টৰ সৈতে সম্পৰ্কিত এক কেলেংকাৰী।
লিক হোৱা নথিসমূহ মূলতঃ জাৰ্মান বাতৰি কাকত চুডডয়চে জেইটুঙৰ দ্বাৰা লাভ কৰা হৈছিল। ইয়াৰে কমেও ১২ হাজাৰ নতুন নথি ভাৰতীয়ৰ সৈতে সম্পৰ্কিত। পূৰ্বৱৰ্তী লিকটো ২০১৬ চনত প্ৰতিবেদিত হৈছিল য’ত কৰ আশ্ৰয়স্থল পানামাত অৱস্থিত আইন প্ৰতিষ্ঠান মোচাক ফনচেকাৰ নথিত ৫০০ তকৈও অধিক ভাৰতীয়ৰ নাম উল্লেখ কৰা হৈছিল।
আনহাতে ১১.৫ নিযুত কৰ দস্তাবেজৰ বৃহৎ লিকৰ সৈতে সাঙোৰ খাই পৰা ৫০০ গৰাকী ভাৰতীয়ৰ নামৰ ভিতৰত আছে অভিনেত্ৰী ঐশ্বৰ্য্য ৰায় বচ্চন আৰু চুপাৰষ্টাৰ অমিতাভ বচ্চনৰ দৰে বিশিষ্ট ব্যক্তিৰ নামো।
আনহাতে প্ৰতিবেদন অনুসৰি, কেন্দ্ৰীয় চৰকাৰে গঠন কৰা মাল্টি-এজেঞ্চী গোটৰ (এমএজি) নিৰীক্ষণৰ অধীনত ৪২৬ জন ভাৰতীয় আছে। ২০১৬ চনৰ লিকৰ পৰা নেতৃত্বৰ অনুসন্ধান কৰি এমএজিৰ দ্বাৰা ১,০০০ কোটি টকাৰ অধিক ক’লা ধন ধৰা পৰিছে।
