আখাৰা পৰিষদৰ অধ্যক্ষ মহন্ত নৰেন্দ্ৰ গিৰিৰ মৃত্যুৰ তদন্ত কৰিব চিবিআইয়ে। উত্তৰ প্ৰদেশ চৰকাৰে এই মৃত্যু কাণ্ডৰ তদন্তৰ বাবে চিবিআইক আবেদন জনোৱাৰ পিছত এতিয়া তদন্তভাৰ হাতত লৈছে। চিবিআইয়ে গোচৰ সন্দৰ্ভত এখন এজাহাৰ পঞ্জীয়ন কৰাৰ লগতে তদন্তৰ বাবে এখন ছয়জনীয়া কমিটিও গঠন কৰিছে।
বাতৰি অনুসৰি, চিবিআইৰ বিশেষ অপৰাধ গোট আৰু এটা ছয় জনীয়া তদন্ত দলে মহন্ত নৰেন্দ্ৰ গিৰিৰ মৃত্যুৰ তদন্ত কৰিব। সূত্ৰঅনুসৰি, চিবিআইৰ মুখ্য কাৰ্যালয়ৰ তদন্তকাৰী দলটো প্ৰয়াগৰাজত উপস্থিত হৈছে। চিবিআইৰ দলটোৱে আখাৰা পৰিষদৰ সভাপতি মহন্ত নৰেন্দ্ৰ গিৰিৰ মৃত্যুত হত্যা বা আত্মহত্যাৰ মাজৰ ৰহস্য সমাধান কৰিব। উত্তৰ প্ৰদেশ আৰক্ষীৰ এছআইটি দলটো বাঘামবাৰী গাড্ডিত উপস্থিত হৈছে।
উত্তৰ প্ৰদেশ আৰক্ষীয়ে এতিয়াও মহন্ত নৰেন্দ্ৰ গিৰিৰ হত্যাৰ ঘটনাৰ তদন্ত কৰি আছিল। খবৰ অনুসৰি নৰেন্দ্ৰ গিৰিয়ে ৬ ছেপ্টেম্বৰত আৰক্ষীৰ ওচৰত অভিযোগ কৰিছিল যে কোনোবাই তেওঁৰ নামত এটা টুইটাৰ একাউণ্ট সৃষ্টি কৰিছে। নৰেন্দ্ৰ গিৰিয়ে আৰক্ষীক বিষয়টো তদন্ত কৰিবলৈ আৰু ব্যৱস্থা ল’বলৈ দাবী জনাইছিল। এই সকলোবোৰৰ মাজতে, প্ৰয়াগৰাজ আদালতে আৰক্ষীক নৰেন্দ্ৰ গিৰি মৃত্যু গোচৰৰ সকলো অভিযুক্তক নিৰাপত্তা প্ৰদান কৰিবলৈ কৈছে।
মহন্ত নৰেন্দ্ৰ গিৰিৰ হত্যাৰ সন্দৰ্ভত গ্ৰেপ্তাৰ হোৱা আনন্দ গিৰি আৰু অদ্য তিৱাৰীয়ে আদালতত এখন আবেদন দাখিল কৰি কৈছিল যে কাৰাগাৰত আৰু কাৰাগাৰৰ পৰা হাজিৰ হোৱাৰ বাবে আদালতলৈ নিয়াৰ সময়ত তেওঁলোক নিৰপত্তাহীনতাত ভুগিছিল। আদালতে তেওঁৰ আবেদনৰ শুনানিৰ সময়ত কাৰাগাৰ কৰ্তৃপক্ষক কাৰাগাৰত নিৰাপত্তা নিশ্চিত কৰিবলৈ নিৰ্দেশ দিয়ে।
ইফালে, নৰেন্দ্ৰ গিৰিয়ে ৬ ছেপ্টেম্বৰত তেওঁৰ নামত এটা ভুৱা টুইটাৰ হেণ্ডেলৰ সন্দৰ্ভত আৰক্ষীৰ ওচৰত লিখিত অভিযোগ কৰিছিল। তেওঁ এই অভিযোগটোত স্বাক্ষৰ কৰিছিল। চুইচাইড নোটতো তেওঁৰ স্বাক্ষৰ আছে। চিবিআইয়ে এজাহাৰ আৰু চুইছাইড নোটৰ নৰেন্দ্ৰ গিৰিৰ স্বাক্ষৰ মিলাই চাব পাৰে।
