তামিলনাডুলৈ বদলি কৰা হৈছে নাগালেণ্ডৰ ৰাজ্যপাল আৰএন ৰবিক। বৃহস্পতিবাৰে নিশা ৰাষ্ট্ৰপতি ৰামনাথ কোৱিন্দে এক জাননী জাৰি কৰি এই কথা জানিবলৈ দিয়ে। ইফালে অসমৰ ৰাজ্যপাল জগদীশ মুখীক নাগালেণ্ডৰ ৰাজ্যপালৰূপে দায়িত্ব অৰ্পণ কৰা হৈছে। নিয়মীয়া ব্যৱস্থা নোহোৱালৈকে জগদীশ মুখীয়ে অসমৰ লগতে নাগালেণ্ডৰো দায়িত্ব নিৰ্বাহন কৰিব।
উল্লেখ্য যে, নাগালেণ্ডৰ বিদ্ৰোহী গোট আৰু চৰকাৰৰ আলোচনাৰ মাজত মধ্যস্থতাকাৰী ৰূপে কাম কৰিছিল ৰাজ্যপাল আৰএন ৰবিয়ে। কিন্তু NSCN-IMয়ে ৰবিক ৰাজ্যপাল আৰু ভাৰত-নগা সমস্যা সমাধানৰ মধ্যস্থতাকাৰী পদৰ পৰা আঁতৰাবলৈ দাবী জনাই আহিছিল ।
