ঋতুপৰ্ণ শৰ্মা, নগাঁওঃ নগাঁও জিলাৰ চামগুৰি সমষ্টিৰ খাটোৱাল আৰক্ষী থানাৰ অন্তৰ্গত গেৰুৱামুখৰ তিনিআলিত যোৱা নিশা আৰক্ষীয়ে অভিযান চলাই এটা কুখ্যাত ড্ৰাগছ ব্যৱসায়ীক আটক কৰাৰ লগতে সজীৱ গুলিৰ সৈতে এটা পিষ্টল আৰু নগদ ধন সহ এখন গাড়ী জব্দ কৰিবলৈ সক্ষম হয়৷
জানিব পৰা মতে খাটোৱাল আৰক্ষী থানাৰ ভাৰপ্ৰাপ্ত আৰক্ষী বিষয়া হৰেণ গগৈৰ নেতৃত্বত এটা আৰক্ষীৰ দলে যোৱা নিশা প্ৰায় ২.২৫ বজাত এক গোপন খবৰৰ ভিত্তিত গেৰুৱামুখ অঞ্চলৰ তিনিআলিত ড্ৰাগছৰ বিৰুদ্ধে অভিযান চলায়৷ আৰক্ষীৰ দলটোৱে অভিযান চলাই থকা সময়ত ৰফিকুল ইছলাম নামৰ কুখ্যাত ড্ৰাগছ ব্যৱসায়ীজনে এক ৰাউণ্ড শূণ্যলৈ গুলি চালনা কৰি পিষ্টলটো পেলাই থৈ পলায়ন কৰে৷
পৰৱৰ্তী সময়ত আৰক্ষীয়ে ৩৫ ৰাউণ্ড সজীৱ গুলিৰ সৈতে .২২ পিষ্টলসহ ২৭ হাজাৰ ৪৮০ টকাসহ এএছ ০২ এছ ০৪৬১ নম্বৰৰ এখন কুইড গাড়ী জব্দ কৰিবলৈ সক্ষম হয়৷
আনহাতে আৰক্ষীৰ চকুত ধুলি দি পলায়ন কৰা উক্ত ড্ৰাগছ ব্যৱসায়ীটোক আটক কৰিবলৈ আৰক্ষীৰ দলটোৱে পুনৰ অভিযান তীব্ৰ কৰি তোলে। যোৱা নিশাৰ পৰা আৰক্ষীৰ দলটোৱে অভিযান চলাই আজি পুৱা গেৰুৱামুখ অঞ্চলৰ নুৰুল ইছলামৰ পুত্ৰ ৰফিকুল ইছলাম (২৫) নামৰ কুখ্যাত ড্ৰাগছ ব্যৱসায়ীটোক আটক কৰাৰ লগলে দুটা ম’বাইল ফোন জব্দ কৰে৷ আৰক্ষীয়ে আজি পুৱা আটক কৰা উক্ত ড্ৰাগছ ব্যৱসায়ীটোৱে ডিমাপুৰৰ পৰা ড্ৰাগছ সৰবৰাহ কৰি চামগুৰিৰ লগতে নগাঁও জিলা খনত অবাধ সম্ৰাজ্য গঢ়ি তুলিছিল বুলি আৰক্ষীৰ এক সুত্ৰই জানিবলৈ দিছে৷
আনহাতে আজি পুৱা আটক কৰা উক্ত ড্ৰাগছ ব্যৱসায়ী জনক আৰু অধিক তথ্যৰ বাবে খাটোৱাল আৰক্ষী থানাত জেৰা অব্যাহত ৰাখিছে বুলি জানিব পৰা গৈছে।
