নগাঁও জিলাৰ শেনচোৱাত সংঘটিত হৈছে ভয়ংকৰ দুৰ্ঘটনা। এখন দুৰ্ঘটনাত পতিত বাহনত খুন্দা আন এখন বাহনৰ। দুৰ্ঘটনাত ৬ জন লোক আহত হোৱা বুলি জানিব পৰা গৈছে।
জানিব পৰা মতে, শনিবাৰে নিশা গুৱাহাটীৰ পৰা নগাঁও হৈ হোজাইলৈ গৈ থকা এএছ ০১ জিচি ৩৮৪১ নম্বৰৰ এখন যাত্ৰীবাহী ট্ৰেভেলাৰে নিয়ন্ত্ৰণ হেৰুৱাই পথৰ মাজৰ ডিভাইডাৰত খুন্দা মাৰি বাগৰি পৰে।
দুৰ্ঘটনাৰ পিছত ঘটনাস্থলীত আৰক্ষী উপস্থিত হৈ স্থানীয় লোকৰ সহযোগত দুৰ্ঘটনাত পতিত বাহনখনৰ পৰা ১০ জন লোকক উদ্ধাৰ কৰিবলৈ সক্ষম হয়। উদ্ধাৰ কৰা ৬ জন আহতক চিকিৎসাৰ বাবে নগাঁও অসামৰিক চিকিৎসালয়লৈ প্ৰেৰণ কৰা হয়।
ইফালে দুৰ্ঘটনাত পতিত ট্ৰেভেলাৰ খনত উদ্ধাৰ অভিযান চলি থকাৰ সময়তে পিছফালৰ পৰা এএছ ০২এএইছ ১৪৮৪ নম্বৰৰ এখন ছুইফ্ট বাহনে ট্ৰেভেলাৰখনত খুন্দা মাৰে।
আৰক্ষীয়ে দুৰ্ঘটনা সংঘটিত কৰা ছুইফ্ট খনৰ চালকজনক আটক কৰিছে।
আনফালে দুৰ্ঘটনাটোত আহত ডবকাৰ শঙ্কৰ দাস, হোজাইৰ বিশ্বজিৎ দাস,জুৰীয়াৰ জালাল উদ্দিন,ৰাঙলুৰ আব্দুল হান্নান , ডবকাৰ দিলোৱাৰ হুছেইন,মোৰাঝাৰৰ জমিল হুছেইন বৰ্তমান নগাঁও অসামৰিক চিকিৎসালয়ত চিকিৎসাধীন হৈ আছে।
