এক গোপন সূত্ৰৰ ভিত্তিত অভিযান চলাই বৃহস্পতিবাৰে নগাঁও আৰক্ষীয়ে এটা গঁড়ৰ খৰ্গ উদ্ধাৰ কৰাৰ লগতে এই গোচৰৰ সৈতে জড়িত তিনিজন সৰবৰাহকাৰীক আটক কৰে।
আটকাধীন সৰবৰাহকাৰী কেইজনৰ পৰিচয় খলিলুদ্দিন, জাকিৰ হুছেইন আৰু আকবৰ আলী বুলি জানিব পৰা গৈছে।
আৰক্ষীয়ে ৰূপহীহাটৰ আমবাগান অঞ্চলত অভিযান চলাই আটক কৰে সৰবৰাহকাৰী কেইজনক।
ইয়াৰ পূৰ্বে গঁড় চোৰাং চিকাৰৰ বিৰুদ্ধে যুঁজত এক বৃহৎ অগ্ৰগতি লাভ কৰি গহপুৰৰ দক্ষিণ অঞ্চলত বিশ্বনাথ আৰক্ষী আৰু গহপুৰ আৰক্ষীৰ যৌথ অভিযানত দুজন চোৰাংচিকাৰীক গ্ৰেপ্তাৰ কৰা হৈছিল। চোৰাং চিকাৰীৰ নাম পংকজ পেগু আৰু অৰবিন্দ পেগু বুলি চিনাক্ত কৰা হৈছে।
জানিব পৰা মতে, গহপুৰৰ দক্ষিণ অঞ্চলত মুক্তভাৱে বিচৰণ কৰি থকাৰ সময়তে এই যুটিয়ে কাজিৰঙাৰ ষষ্ঠ সংযোজনৰ পৰা ওলাই অহা এটা গঁড় হত্যাৰ পৰিকল্পনা ৰচনা কৰিছিল। কিন্তু আইন প্ৰয়োগকাৰী বিষয়াই তেওঁলোকৰ কাৰ্যকলাপৰ বতাহ ধৰাত তেওঁলোকৰ পৰিকল্পনা বিফল হয়।
