ঋতুপৰ্ণ শৰ্মা, নগাঁওঃ অসম বিজ্ঞান প্ৰযুক্তিবিদ্যা আৰু পৰিৱেশ পৰিষদৰ সৌজন্যত উত্তৰ শিলপুখুৰী মাধ্যমিক বিদ্যালয় তথা বৃহত্তৰ বৰচিলা আঞ্চলিক ৰাইজৰ আতিথ্যত অহা ২৯ আৰু ৩০ এপ্ৰিলত দুদিনীয়া কাৰ্যসূচীৰে নগাঁও-মৰিগাঁও জিলাৰ সীমান্তৱৰ্তী বৰচিলাত “গ্ৰাম্য বিজ্ঞান মেলা”ৰ আয়োজন কৰা হৈছে। উত্তৰ শিলপুখুৰী মাধ্যমিক বিদ্যালয় প্ৰাংগণত আয়োজিত বিজ্ঞান মেলাৰ কাৰ্যসূচী অনুসৰি ২৯ এপ্ৰিলত পুৱা পতাকা উত্তোলন, গছপুলি ৰোপন, শোভাযাত্ৰাৰ অন্তত বিজ্ঞানৰ নমুনা প্ৰতিযোগিতা, প্ৰদৰ্শনীৰ দ্বাৰ উন্মোচন আৰু চিত্ৰাংকন প্ৰতিযোগিতা অনুষ্ঠিত হ’ব।
ইয়াৰ পাছতে অনুষ্ঠিত হ’ব ডিমৰীয়া মহাবিদ্যালয়ৰ সহযোগী অধ্যাপক মোহিনী মোহন ডেকাৰ সঞ্চালনাত আমন্ত্ৰিত অতিথিৰ দ্বাৰা “পৰিৱেশ আৰু জীৱনৰ সুৰক্ষাৰ বাবে আদ্ৰভূমি আৰু আমাৰ কৰণীয়” আৰু “যুৱ স্বাস্থ্য ধঁপাত আৰু অন্যান্য নিচা জাতীয় দ্ৰব্যসেৱনৰ কুপ্ৰভাৱ আৰু প্ৰতিকাৰ” শীৰ্ষক বক্তৃতা অনুষ্ঠান। বক্তৃতা অনুষ্ঠানটি উদ্বোধন কৰিব অসম বিজ্ঞান সমিতিৰ ভাৰপ্ৰাপ্ত প্ৰধান সচিব মৃণাল হাজৰিকাই।
৩০ এপ্ৰিলত পুৱা পৰিৱেশ নিকাকৰণৰ পাছতে বিজ্ঞান বিষয়ক কুইজ প্ৰতিযোগিতা। ইয়াৰ পাছতে তিৱা সাহিত্য সভাৰ সভাপতি দীপেন্দ্ৰ নাথ বৰদলৈৰ সঞ্চালনাত অনুষ্ঠিত হ’ব “প্ৰাপ্ত বয়স্কসকলৰ অন্ধবিশ্বাস আৰু শিশুৰ মানসিক বিকাশত ইয়াৰ প্ৰভাৱ” আৰু “বন্যপ্ৰাণীসমূহৰ গুৰুত্ব আৰু সুৰক্ষাৰ বাবে আমাৰ কৰণীয়” শীৰ্ষক বক্তৃতা অনুষ্ঠান। বক্তৃতা অনুষ্ঠানটি উদ্বোধন কৰিব বটদ্ৰৱা সমষ্টিৰ বিধায়িকা শিৱামণি বৰাই। গ্ৰাম্য বিজ্ঞান মেলাৰ দুয়োদিনৰ কাৰ্যসূচীত শিক্ষাৰ্থী আৰু ৰাইজৰ উপস্থিতি উদ্যোক্তাসকলে আন্তৰিকতাৰে কামনা কৰিছে।
