বৃহস্পতিবাৰে তেলেংগানাই লাভ কৰিলে নতুন মুখ্যমন্ত্ৰী। কংগ্ৰেছৰ ৰেৱন্ত ৰেড্ডীয়ে মুখ্যমন্ত্ৰী হিচাপে শপত গ্ৰহণ কৰে। ৰেৱন্ত ৰেড্ডীৰ নেতৃত্বতে দক্ষিণ ভাৰতৰ আন এখন ৰাজ্যত গঠন হ’ল কংগ্ৰেছ চৰকাৰ। ইফালে মূখ্যমন্ত্ৰী হোৱাৰ পূৰ্বেই ৰেৱন্ত ৰেড্ডীয়ে পালন কৰি দেখুৱালে নিজৰ প্ৰতিশ্ৰুতি। শপত লোৱাৰ পূৰ্বে বুলডজাৰৰ সহায়ত প্ৰগতি ভৱন (মুখ্যমন্ত্ৰীৰ বাসগৃহ)ৰ সমীপৰ দেৱালখন আঁতৰাই ৰেৱন্ত ৰেড্ডীয়ে পূৰণ কৰে প্ৰতিশ্ৰুতি।
জনসাধাৰণৰ প্ৰৱেশ আৰু যান-বাহনৰ চলাচল সহজ কৰিবলৈ প্ৰগতি ভৱনৰ সন্মুখত স্থাপন কৰা লোহাৰ বেৰিকেড আঁতৰোৱা হৈছে। বিধায়ক দনাছাৰী সীটককাই টুইটাৰযোগে এক পোষ্টযোগে কয় যে প্ৰগতি ভৱনৰ চেড আৰু গ্ৰীল আঁতৰাই দিয়া হৈছে।
উল্লেখ্য যে ৰেৱন্ত ৰেড্ডীয়ে কৈছিল যে প্ৰগতি ভৱনৰ (মুখ্যমন্ত্ৰীৰ বাসগৃহ) দুৱাৰ ৰাইজৰ বাবে খোলা থাকিব। ইয়াৰ নাম সলনি কৰি ড° বি আৰ আম্বেদকাৰ প্ৰজা ভৱন কৰা হ’ব। প্ৰগতি ভৱন নিৰ্মাণৰ বাবে মুঠ ব্যয় হৈছিল প্ৰায় ৫০ কোটি টকা। ২০২২ চনত আৰ টি আইৰ জৰিয়তে এই কথা প্ৰকাশ পাইছিল। প্ৰগতি ভৱন ৰাজ্যৰ মুখ্যমন্ত্ৰীৰ চৰকাৰী বাসগৃহ।
কে চন্দ্ৰশেখৰ ৰাওৱে মুখ্যমন্ত্ৰী হৈ থকা সময়ত ২০১৬ চনত মহানগৰীৰ মাজমজিয়াত এই ভৱনটো নিৰ্মাণ কৰিছিল। অফিচাৰ্ছ কলনীত ১০টা আই এ এছ বিষয়াৰ কোৱাৰ্টাৰ আৰু ২৪টা পিয়ন কোৱাৰ্টাৰ ভাঙি নিৰ্মাণ কৰা হৈছিল। ৯ একৰ মাটিত নিৰ্মিত এই কমপ্লেক্সটোৰ ব্যয় ২০১৬-২০১৭ বিত্তীয় বৰ্ষত আছিল ৪৫,৯১,০০,০০০ টকা। প্ৰগতি ভৱন হৈছে এটা পাঁচ মহলীয়া অট্টালিকা। ইয়াত বাসগৃহ, মুখ্যমন্ত্ৰীৰ কাৰ্যালয়, জনহিত (সভাকক্ষ), পুৰণি মুখ্যমন্ত্ৰীৰ বাসগৃহ আৰু শিবিৰৰ কাৰ্যালয় আছে।
শপতগ্ৰহণ অনুষ্ঠানত অংশগ্ৰহণ কৰে ছোনিয়া, ৰাহুল আৰু প্ৰিয়ংকা গান্ধীয়ে। ছোনিয়া, ৰাহুল আৰু প্ৰিয়ংকাক নেতৃত্ব দিবলৈ নিজেই হায়দৰাবাদ বিমানবন্দৰত উপস্থিত হৈছিল ৰেৱন্ত ৰেড্ডী। তেলেংগানাত প্ৰথম কংগ্ৰেছ চৰকাৰৰ শপত গ্ৰহণ অনুষ্ঠানত দলৰ অধ্যক্ষ মল্লিকাৰ্জুন খাৰ্গে আৰু কৰ্ণাটকৰ মুখ্যমন্ত্ৰী সিদ্দাৰমৈয়া আৰু উপ মুখ্যমন্ত্ৰী ডি কে শিৱকুমাৰকে ধৰি বহু নেতাই অংশগ্ৰহণ কৰে।
মহবুবনগৰ জিলাৰ কন্দাৰেড্ডী পল্লীৰ পৰা অহা ৫৪ বছৰীয়া ৰেৱন্তৰ সম্পূৰ্ণ নাম অনুমুলা ৰেৱন্ত ৰেড্ডী। ওছমানিয়া বিশ্ববিদ্যালয়ৰ পৰা স্নাতক ডিগ্ৰী লাভ কৰা ৰেৱন্ত ৰেড্ডীয়ে বিজেপিৰ ছাত্ৰ শাখা এবিভিপিৰ সৈতে ৰাজনীতি আৰম্ভ কৰিছিল। ২০০৭ চনত তেওঁ নিৰ্দলীয় প্ৰাৰ্থী হিচাপে অন্ধ্ৰ প্ৰদেশ বিধান পৰিষদৰ সদস্য হিচাপেও নিৰ্বাচিত হয়। ২০০৯ চনত চন্দ্ৰবাবু নাইডুৰ নিৰ্দেশত তেওঁ তেলেগু দেশম পাৰ্টিত যোগদান কৰে।
২০১৭ চনত ৰেৱন্ত ৰেড্ডীয়ে টিডিপি এৰি কংগ্ৰেছত যোগদান কৰে। ২০১৯ চনত প্ৰথমবাৰৰ বাবে মলকজগিৰি আসনৰ পৰা সাংসদ হৈছিল। ২০২১ চনৰ জুন মাহত কংগ্ৰেছ হাইকমাণ্ডে তেওঁক জ্যেষ্ঠ নেতা এন. উত্তম ৰেড্ডীৰ ঠাইত তেলেংগানাৰ কমাণ্ড অৰ্পণ কৰে। কংগ্ৰেছৰ সভাপতি হিচাপে ৰেৱন্ত ৰেড্ডীয়ে বিধানসভা নিৰ্বাচনত বি আৰ এছক পৰাস্ত কৰি তেলেংগানাত দলটোক ক্ষমতালৈ অনাত সফল হয়।
