কেন্দ্ৰীয় বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালে দেওবাৰে ডিব্ৰুগড়ৰ বগীবিল দলঙৰ ওচৰত প্ৰস্তাৱিত কাৰ্গো টাৰ্মিনেল, টুৰিষ্ট জেটি আৰু ৰিভাৰ ফ্ৰণ্ট ডেভেলপমেণ্ট প্ৰকল্পৰ বাবে স্থান পৰিদৰ্শন কৰে আৰু কামটো দ্ৰুতগতিত ৰূপায়ণৰ বাবে অংশীদাৰ সকলৰ সৈতে এখন বৈঠকত মিলিত হয়।
কেন্দ্ৰীয় মন্ত্ৰী সোণোৱালে কয় যে ডিব্ৰুগড়ক দেশৰ এখন মুখ্য নদী বন্দৰ হিচাপে গঢ়ি তুলিবলৈ আকৌ এবাৰ প্ৰয়োজনীয় পদক্ষেপ লোৱা হৈছে।
“প্ৰধানমন্ত্ৰী নৰেন্দ্ৰ মোদীয়ে এনডব্লিউ ২ (ব্ৰহ্মপুত্ৰ) আৰু এনডব্লিউ ১৬ (বৰাক)ৰ বিকাশত প্ৰদান কৰা সুযোগসমূহে বাংলাদেশৰ সৈতে আমাৰ সংযোগৰ সুবিধা লাভ কৰিছে আৰু আমাক বিশ্বৰ বজাৰত উপনীত হোৱাৰ পথ প্ৰদান কৰিছে। সেয়েহে আমি এমএমএলপি স্থাপন কৰি আছো আৰু অসমৰ বিভিন্ন ঠাইত নদী বন্দৰ বিকশিত কৰি আছো। ডিব্ৰুগড়ত কাৰ্গো আৰু যাত্ৰীসকলৰ বাবে এটা বন্দৰ নিৰ্মাণ কৰা হ’ব,” মন্ত্ৰীগৰাকীয়ে কয়।
কেন্দ্ৰীয় মন্ত্ৰীগৰাকীয়ে লগতে কয় যে বন্দৰ, জাহাজ আৰু জলপথ মন্ত্ৰালয়, অসম চৰকাৰৰ আভ্যন্তৰীণ জল পৰিবহন বিভাগ আৰু উত্তৰ-পূব সীমান্ত ৰে’লৱেই বগীবিল দলঙৰ ওচৰৰ অঞ্চলটোৰ উন্নয়নৰ বাবে একেলগে কাম কৰি আছে।
“প্ৰধানমন্ত্ৰী নৰেন্দ্ৰ মোডীৰ এক্ট ইষ্ট পলিচীয়ে উত্তৰ-পূৰ্বাঞ্চলক এক সংযোগ কেন্দ্ৰলৈ ৰূপান্তৰিত কৰিছে। প্ৰধানমন্ত্ৰী গতিশক্তি – ৰাষ্ট্ৰীয় মাষ্টাৰ প্লেনৰ নেতৃত্বত ব্ৰহ্মপুত্ৰ নদীত কাৰ্গো চলাচল ত্বৰান্বিত কৰাৰ বাবে এক সমন্বিত পৰিকল্পনা প্ৰস্তুত কৰা হৈছে। ই নিযুক্তিৰ পথ মুকলি কৰিব আৰু স্থানীয় সামগ্ৰীৰ বাবে বিশ্বব্যাপী বজাৰৰ প্ৰৱেশাধিকাৰ প্ৰদান কৰিব,” কেন্দ্ৰীয় মন্ত্ৰীগৰাকীয়ে কয়।
