জুই জ্বলিছে মণিপুৰত, পৰিস্থিতি ক্ৰমাৎ নিয়ন্ত্ৰণৰ বাহিৰত, পুনৰ জাপি দিলে AFSPA।ক্ৰমাৎ হিংসাত্মক হৈ উঠিছে মণিপুৰৰ পৰিস্থিতি। জনতাৰ প্ৰতিবাদত তিষ্ঠিব নোৱাৰি ইতিমধ্যে বিজেপিৰ কেইবাগৰাকী নেতাই পদত্যাগ কৰিছে। সাম্প্ৰতিক মণিপুৰৰ পৰিস্থিতিৰ বিষয়ে অৱগত কৰি জিৰিবাম জিলাৰ কেইবাজনো বিজেপি নেতাই ৰাজ্যিক সভাপতিলৈ প্ৰেৰণ কৰিছে পদত্যাগ পত্ৰ। ইফালে বিজেপি নেতাকেইজনৰ পদত্যাগ সম্পৰ্কত কোনো পত্ৰ পোৱা নাই পোৱা বুলি স্পষ্ট কৰি দিছে মণিপুৰ বিজেপিৰ ৰাজ্যিক কাৰ্যালয়ৰ তৰফৰ পৰা। উল্লেখ্য যে, যৌথভাৱে দিয়া পদত্যাগ পত্ৰখনত স্বাক্ষৰ কৰিছিল জিৰিবামৰ কেইবাজনো বিজেপি নেতাই। ১১ নৱেম্বৰত কুকি উগ্ৰপন্থীয়ে শিশু আৰু মহিলাসহ ৬গৰাকী লোকক অপহৰণ কৰাৰ পাছতে উত্তপ্ত হৈ পৰিছিল পৰিস্থিতি। কুকি উগ্ৰপন্থীয়ে অপহৰণ কৰা আটাইৰে মৃতদেহ উদ্ধাৰ হৈছিল পৰৱৰ্তী সময়ত। ইয়াৰ পাছতে পৰিস্থিতি ক্ৰমাৎ উত্তপ্ত হৈ পৰিছে মণিপুৰৰ।অশান্ত মণিপুৰক লৈ উদ্বিগ্ন হৈ পৰিছে কেন্দ্ৰীয় চৰকাৰ। মণিপুৰৰ শেহতীয়া পৰিস্থিতি পৰ্যবেক্ষণ কৰিছে কেন্দ্ৰীয় গৃহ সচিবে। মণিপুৰত বাহৰ পাতি পৰিস্থিতি পৰ্যবেক্ষণ চিআৰপিএফৰ ডিজিৰ। অশান্ত ৰাজ্যখনৰ প্ৰান্তে প্ৰান্তে অব্যাহত আছে হিংসাত্মক ঘটনা। বিধায়ক-মন্ত্ৰীৰ সৈতে মণিপুৰৰ পৰিস্থিতিৰ পৰ্যালোচনা কৰে মুখ্যমন্ত্ৰী এন বীৰেণ সিঙে। ইফালে শেহতীয়া পৰিস্থিতিৰ বাবে ১৯ নৱেম্বৰলৈ বন্ধ ঘোষণা কৰিছে সকলো শিক্ষানুষ্ঠান।
