ৰিদিপ বৰঠাকুৰ, বিশ্বনাথ: চৰাইদেউ জিলাত অসম ক্ৰিকেট সন্থাৰ তত্বাৱধানত এক কোটি টকা ব্যয় সাপেক্ষে সোণাৰিৰ ৰজাপুখুৰীত স্থাপন হ’ব লগীয়া ক্ৰিকেট পেভেলিয়ানৰ আধাৰশিলা স্থাপন কৰে অসম ক্ৰিকেট সন্থাৰ সভাপতি ৰমেন দত্তৰ লগতে সম্পাদক দেবজিৎ শইকীয়াই।
আধাৰশিলা অনুষ্ঠানত অসম ক্ৰিকেট সন্থাৰ কেইবা গৰাকীও বিষয়ববীয়া উপস্থিত থাকে । অসমৰ চুকে কোণে সোমাই থকা প্ৰতিভাবান খেলুৱৈ সকলক আগুৱাই নিবলৈ অসমৰ প্ৰায় জিলা সমুহতে খেলৰ বাতাবৰণ সৃষ্টি কৰাৰ লক্ষ্যৰে প্ৰতিখন জিলাতে পেভেলিয়ান নিৰ্মাণ কাৰ্য্য চলাই যোৱা বুলি কেন্দ্ৰীয় সমিতিৰ সভাপতি গৰাকীয়ে জানিব দিয়ে ।
পেভেলিয়ানৰ কাম আগন্তুক ছয় মাহৰ ভিতৰত সম্পূৰ্ণ কৰাৰ লক্ষ্য লোৱা বুলি উল্লেখ কৰে। চৰকাৰৰ সদ ইচ্ছাৰ বাবে অসম তথা ভাৰতবৰ্ষই আন্তঃৰাষ্ট্ৰীয় পৰ্যায়ত খেলুৱৈ সকলে সুনাম কঢ়িয়াই আনিবলৈ সক্ষম হোৱা বুলি উল্লেখ কৰে । সভাখনৰ আঁত ধৰে প্ৰিন্স মোক্তাবুল হুচেইনে ।
