গোৰেশ্বৰত ডিঙিত চিপ লোৱা অৱস্থাত উদ্ধাৰ এগৰাকী মেধাৱী ছাত্ৰীৰ মৃতদেহ
তামুলপুৰ জিলাৰ গোৰেশ্বৰ থানাৰ অন্তৰ্গত বাঘডোবা গাঁৱৰ মনোৰঞ্জন বড়ো আৰু আঞ্চলিক বড়োৰ কন্যা অজন্তা বড়োই(২১) বৃহস্পতিবাৰে দিনৰ এক বজাত নিজৰ শোৱনী কোঠাত চিপ লৈ আত্মহত্যা কৰে। অজন্তা বড়ো গুৱাহাটীৰ কটন কলেজৰ পঞ্চম ষান্নাষিকৰ ছাত্ৰী আছিল। গণিত বিষয়ত মেজৰ আছিল অজন্তা বড়োৰ।
পঢ়া শুনাত অতিকৈ চোকা অজন্তা বড়োই মেট্ৰিকত ৯৩% নম্বৰ লৈ উত্তীৰ্ণ হৈছিল আৰু লগতে উচ্চ মাধ্যমিকত ৮৩% নম্বৰ লৈ উত্তীৰ্ণ হৈছিল। ভৱিষ্যতে অজন্তাৰ এগৰাকী IAS বিষয়া হোৱাৰ মন আছিল।অসম লোকসেৱা আয়োগৰ পৰীক্ষাৰও প্ৰশিক্ষণ লৈ আছিল অজন্তাই। আনকি চৰকাৰে অনুষ্ঠিত কৰা তৃতীয় আৰু চতুৰ্থ বিভাগৰ পৰীক্ষাতো উত্তীৰ্ণ হৈছিল অজন্তাই। কিন্তু পৰিয়ালৰ আৰ্থিক অনাটনৰ কাৰণে আজি অকালতে শেষ হ’ল এগৰাকী মেধাৱী ছাত্ৰীৰ জীৱন।
মৃত্যুৰ আগমূহুৰ্তত ছুছাইড টোকা লিখি চিৰদিনৰ বাবে গুছি গ’ল অজন্তা।জানিব পৰা মতে ছুছাইড টোকাত এনেধৰণৰে উল্লেখ কৰিছিল অজন্তাই- ‘I Hate my life’
‘I Hate my life so much’
‘My family economical problem is very bed’।
পৰিয়ালৰ লোকে জানিব দিয়া মতে বহু দিন ধৰি অজন্তাই হতাশাত ভুগি আছিল।আজি অজন্তাৰ মৃত্যুত পৰিয়ালৰ লগতে সমগ্ৰ অঞ্চল জুৰি শোকত ভাগি পৰিছে।ঘটনা স্থলীত গোৰেশ্বৰ আৰক্ষী সহ গোৰেশ্বৰ দণ্ডাধিশ উপস্থিত হৈ উক্ত ঘটনাৰ তদন্ত কৰাৰ লগতে মৃতদেহটো মৰণোত্তৰ পৰীক্ষাৰ বাবে মুছলপুৰলৈ প্ৰেৰণ কৰে।
