সীমান্তৰ সিপাৰৰ পৰা পুনৰ পঞ্জাৱৰ আকাশত প্ৰৱেশ পাকিস্তানী ড্ৰোনৰ। কিন্তু কোনো বিপদ সংঘটিত হোৱাৰ পূৰ্বে ড্ৰোনখন আকাশমাৰ্গত গুলীয়াই ধ্বংস কৰিবলৈ সক্ষম হয় বিএছএফে।
নিৰাপত্তাৰক্ষীৰ সূত্ৰৰ পৰা জানিব পৰা মতে, ড্ৰ’নখনৰ পৰা উদ্ধাৰ হৈছে গোলাবাৰুদ। সীমান্তৰ সিপাৰৰ পৰা ড্ৰ’নেৰে তেওঁলোকক ভেঙুচালিৰ বাবে প্ৰেৰণ কৰা বুলি সন্দেহ প্ৰকাশ কৰিছে বাহিনীয়ে।
বি এছ এফে জনোৱা মতে, বৃহস্পতিবাৰে গুৰদাসপুৰৰ সীমান্তৱৰ্তী নবীনগৰ গাঁৱত ড্ৰ’নখন উৰি থকা দেখা গৈছিল। নিৰাপত্তাৰক্ষীৰ দৃষ্টিগোচৰ হোৱাৰ লগে লগে গুলীচালনা কৰা হয়। ইয়াৰ পিছতে সমগ্ৰ অঞ্চলটোত বাহিনীয়ে অৱতৰণ কৰা ড্ৰ’নখনৰ সন্ধান আৰম্ভ কৰে।
ড্ৰোনখনৰ পৰা এটা এ কে ছিৰিজ ৰাইফল, দুটা মেগজিন আৰু ৪০টা গুলী উদ্ধাৰ কৰা হৈছে। চলিত বৰ্ষৰ জানুৱাৰী মাহত গুৰদাসপুৰত বি এছ এফে পাক ড্ৰোন নিক্ষেপ কৰিছিল। উদ্ধাৰ হৈছে অস্ত্ৰটো। বাহিনীয়ে জনোৱা মতে, ড্ৰ’নৰ জৰিয়তে ভেঙুচালিৰ বাবে অস্ত্ৰ-শস্ত্ৰ সৰবৰাহ কৰাৰ চেষ্টা কৰা হৈছে।
ড্ৰোনখনৰ পৰা কেইবাটাও পিষ্টল, মেগজিন আৰু কাৰ্টিজ উদ্ধাৰ কৰা হৈছে। বি এছ এফে কয় যে উদ্ধাৰ হোৱা অস্ত্ৰসমূহ চীনত নিৰ্মাণ কৰা হৈছে। মন কৰিবলগীয়া যে যোৱা বছৰ পঞ্জাৱৰ সীমান্তৱৰ্তী অঞ্চলত সীমান্তৰক্ষী বাহিনীয়ে কেইবাখনো ড্ৰ’ন নিক্ষেপ কৰিছিল। ইয়াৰ ভিতৰত বি এছ এফৰ জোৱানসকলে যোৱা ডিচেম্বৰ মাহত অমৃতসৰৰ ৰাজতাল এলেকাত সন্দেহজনক ড্ৰ’ন গুলীয়াই নিক্ষেপ কৰিছিল।
