অসমৰ মুখ্যমন্ত্ৰী হিমন্ত বিশ্ব শৰ্মাই আনন্দ প্ৰকাশ কৰি কয় যে গুৱাহাটীৰ মানুহে ভাৰতীয় জনতা পাৰ্টিৰ (বিজেপি) ওপৰত বিশ্বাস পুনৰ নিশ্চিত কৰিছে।
গুৱাহাটী পৌৰ নিগমৰ (জিএমচি) নিৰ্বাচনত বিজেপিয়ে ব্যাপক বিজয় লাভ কৰাৰ পিছত শৰ্মাই এইকথা কয়।
তেওঁ কয়, “জিএমচি নিৰ্বাচনত বিজেপি আৰু ইয়াৰ সহযোগী দলসমূহক ৫৮/৬০ টা ৱাৰ্ডৰ ঐতিহাসিক জয় প্ৰদান কৰাৰ বাবে মই গুৱাহাটীৰ জনসাধাৰণৰ ওচৰত ধন্যবাদ জনাইছো। এই বৃহৎ জনাদেশৰ সৈতে, মাননীয় প্ৰধানমন্ত্ৰী নৰেন্দ্ৰ মোদীৰ নিৰ্দেশনাত আমাৰ উন্নয়ন যাত্ৰাৰ ওপৰত জনসাধাৰণে তেওঁলোকৰ বিশ্বাস পুনৰ নিশ্চিত কৰিছে।”
“আপোনাৰ শুভকামনা আৰু আশীৰ্বাদৰ বাবে আমি আপোনালোকৰ ওচৰত অত্যন্ত কৃতজ্ঞ। এইটো উত্তৰ-পূৰ্বাঞ্চলত আপোনাৰ বিস্ময়কৰ দৃষ্টিভংগী আৰু শক্তিশালী উন্নয়নমূলক পদক্ষেপৰ ফল। গুৱাহাটী যথেষ্ট কৃতজ্ঞ।” শৰ্মাই লগতে কয়।
ইফালে, প্ৰধানমন্ত্ৰী নৰেন্দ্ৰ মোদীয়ে বিজেপি আৰু অগপক ‘বৃহৎ জনাদেশ’ দিয়াৰ বাবে গুৱাহাটীৰ জনসাধাৰণকো ধন্যবাদ জ্ঞাপন কৰে।
বিজেপি আৰু ইয়াৰ সহযোগী অসম গণ পৰিষদে (অগপ) ৬০ টা ৱাৰ্ডৰ ভিতৰত ৫৮ টা ৱাৰ্ডত জয়ী হৈছিল। আনহাতে, আম আদমী পাৰ্টীয়ে এটা ৱাৰ্ড ত জয়ী হৈ আত্মপ্ৰকাশ কৰে আৰু এজেপিয়েও এটা ৱাৰ্ডত জয়লাভ কৰিছে।
ইফালে, বহু পুৰণি দল কংগ্ৰেছে এটাও ৱাৰ্ড ধৰি ৰাখিবলৈ ব্যৰ্থ হয়।
