গুগল মেপ ব্যৱহাৰ কৰি বিপদত পৰিল অসম আৰক্ষী। অজানিতে অসম সীমান্ত অতিক্ৰম কৰি নাগালেণ্ডলৈ গৈছিল আৰক্ষীৰ এটা দল। কেৱল ইমানে নহয় গোটেই নিশা স্থানীয় লোকে আৱদ্ধ কৰি ৰাখিলে দলটোক।কেতিয়াবা গুগল মেপ ব্যৱহাৰ কৰি যথেষ্ট সমস্যাৰ সন্মুখীন হ’বলগীয়া হয়। তেনে এটা ঘটনা সংঘটিত হৈছে অসমত।গুগল মেপৰ জৰিয়তে এজন অপৰাধীৰ অনুসন্ধানত গৈছিল অসম আৰক্ষীয়ে। কিন্তু ভুলবশতঃ তেওঁলোক নাগালেণ্ডত উপস্থিত হয়। তেওঁলোকৰ ভিতৰত মাত্ৰ তিনিজনে আৰক্ষীৰ পোছাক পিন্ধিছিল। বাকীবোৰ সাধাৰণ পোছাকত আছিল। নাগালেণ্ডৰ স্থানীয় লোকে ভাবিছিল যে কোনোবা অপৰাধী হয়তো তেওঁলোকৰ এলেকাত প্ৰৱেশ কৰিছে। তাৰ পাছতে তেওঁলোকে আৰক্ষীৰ দলটোক আক্ৰমণ কৰিছিল আৰু তেওঁলোকক গোটেই নিশা বন্দী কৰি ৰাখিছিল। অসম আৰক্ষীৰ এটা ১৬জনীয়া দলে অজানিতে গুগল মেপৰ জৰিয়তে নাগালেণ্ডৰ মকোকচুং জিলাত উপস্থিত হয়। তাৰ পিছত স্থানীয় লোকসকলে আৰক্ষীসকলক অপৰাধী বুলি ভাবি আক্ৰমণ কৰে আৰু তেওঁলোকক বন্দী কৰি ৰাখে।মঙলবাৰে নিশা সংঘটিত হৈছিল এই ঘটনা।নাগালেণ্ডৰ প্ৰতিকূল পৰিস্থিতিৰ বিষয়ে তথ্য লাভ কৰি যোৰহাট আৰক্ষীয়ে লগে লগে মোকোকচুঙৰ আৰক্ষী অধীক্ষকৰ সৈতে যোগাযোগ কৰে। যিয়ে অসম আৰক্ষীৰ জোৱানসকলক উদ্ধাৰ কৰিবলৈ ঘটনাস্থলীলৈ এটা দল প্ৰেৰণ কৰে। তেতিয়া স্থানীয় লোকসকলে অনুভৱ কৰিছিল যে এইটো প্ৰকৃততে অসম আৰক্ষীৰ দল। তেওঁলোকে পাছত আঘাতপ্ৰাপ্ত ব্যক্তিসহ পাঁচজন সদস্যক মুকলি কৰি দিছিল। অৱশ্যে, তেওঁলোকে বাকী ১১ জন লোকক নিশাটো বন্দী কৰি ৰাখি ৰাতিপুৱা মুকলি কৰি দিছিল। তাৰ পাছত যোৰহাটত উপস্থিত হয় আৱদ্ধ হৈ থকা আৰক্ষীৰ দলটো।
