কৰ’না মহামাৰীৰ আতংক, ল’ক ডাউনৰ জটিল সময়ত, সাংবাদিক -সংবাদকৰ্মীৰ জীৱন – জীৱিকাক সুৰক্ষা প্ৰদানৰ দাবী জাফা আৰু দিছপুৰ প্ৰেছ ক্লাবৰ


ষ্টাফৰিপোৰ্টাৰ, ২২ মে’ : কৰ’না মহামাৰীক কেন্দ্ৰ কৰি দেশ তথা ৰাজ্যত সৃষ্টি হোৱা এই জটিল সময়ছোৱাত বিভিন্ন সংবাদ প্ৰতিষ্ঠান, সংবাদমাধ্যমত কৰ্মৰত হৈ থকা সাংবাদিক আৰু সংবাদকৰ্মীক অজুহাত দেখূৱাই চাকৰিৰ পৰা অব্যাহতি নিদিবলৈ সকলো সংবাদ প্ৰতিষ্ঠান আৰু সংবাদ মাধ্যমৰ কতৃপক্ষলৈ আহ্বান জনাইছে জাফা আৰু দিছপুৰ প্ৰেছ ক্লাবে । এক বিবৃতিত জাফাৰ কেন্দ্ৰীয় সমিতিৰ প্ৰধান সম্পাদক আৰু দিছপুৰ প্ৰেছ ক্লাবৰ সাধাৰণ সম্পাদক কুঞ্জ মোহন ৰায়ে কয় “যি সময়ত সকলো সাংবাদিক, সংবাদকৰ্মীয়ে দেশ, জাতি, সমাজৰ স্বাৰ্থত আনান্য সকলৰ লেখিয়াকৈ উৎসৰ্গীত মনোভাৱেৰে কৰ’না মহামাৰীৰ বিৰূদ্ধে চলি থকা যুঁজখনত চৰকাৰক সহায় কৰি আহিছে সেই সযয়ত কৰ’না সৃষ্ট সংকটৰ দোহাই দি সাংবাদিক – সংবাদকৰ্মীৰ ছাটাই অভিযান কোনো কাৰণতে গ্ৰহণযোগ্য নহ’য় ।
সাংবাদিকৰ জীৱন – জীৱিকাৰ সুৰক্ষাৰ দিশটোত শ্ৰমবিভাগ আৰু চৰকাৰখনেও গুৰুত্ব দিয়া উচিত বুলি উল্লেখ কৰি বিবৃতি যোগে এই ক্ষেত্ৰত প্ৰয়োজনীয় ব্যৱস্থা গ্ৰহণৰো দাবী জনায় । তেওঁ লগতে কয় “ছচিয়েল মিডিয়াত ব্যাপক চৰ্চা হৈ থকা অনুসৰি যদি অসমৰ সাংবাদিকতাৰ জগতখনত প্ৰায় দুই দশক ধৰি সংবাদসেৱা আগবঢ়াই অহা এগৰাকী সাহসী তথা দায়িত্ত্বশীল আৰু নিষ্ঠাবান বুলি পৰিচিত মহিলা সাংবাদিক ৰঞ্জিতা ৰাভাক গৰ্ভৱতী হোৱাৰ বাবেই যদি চাকৰিৰ পৰা অব্যাহতি দিয়া হৈছে তেন্তে সেয়া চূড়ান্ত অমানৱীয় আৰু আইন বিৰোধী কাম হৈছে ।
সাংবাদিক ৰঞ্জিতা ৰাভাক চাকৰিৰ পৰা অব্যাহতি দিয়া ঘটনা সম্পৰ্কত টি ভি চেনেলটোৰ কতৃপক্ষই শীঘ্ৰে নিজৰ স্থিতি ৰাজহুৱা কৰা উচিত।”