পাকিস্তানক এক ডাঙৰ আঘাত দিলে এছিয়ান ক্ৰিকেট কাউন্সিলে (এচিচি)। সোমবাৰে তেওঁলোকে এছিয়া কাপক পাকিস্তানৰ বাহিৰত স্থানান্তৰ কৰাৰ সিদ্ধান্ত লয়। পাকিস্তান ক্ৰিকেট ব’ৰ্ডৰ প্ৰতিযোগিতাখন হাইব্ৰিড মডেলত আয়োজন কৰাৰ প্ৰস্তাৱ এচিচি সদস্য ৰাষ্ট্ৰসমূহে নাকচ কৰে। ছেপ্টেম্বৰ মাহত সংযুক্ত আৰৱ আমিৰাত অত্যাধিক আৰ্দ্ৰ পৰিস্থিতিত খেলুৱৈসকল আঘাতপ্ৰাপ্ত হোৱাৰ সম্ভাৱনাৰ পৰিপ্ৰেক্ষিতত শ্ৰীলংকা ছয়খন দেশৰ প্ৰতিযোগিতা আয়োজনৰ ক্ষেত্ৰত শীৰ্ষস্থানত আছে। এই আঘাতৰ পিছত ২ ৰ পৰা ১৭ ছেপ্টেম্বৰৰ ভিতৰত অনুষ্ঠিত হ’বলগীয়া প্ৰতিযোগিতাখনত পাকিস্তানে অংশগ্ৰহণ কৰিব নে নাই সেয়া চাবলৈ আকৰ্ষণীয় হ’ব। দুয়োখন দেশৰ মাজত কূটনৈতিক উত্তেজনাৰ বাবে বিচিচিআইয়ে ভাৰতীয় দলটোক চুবুৰীয়া দেশলৈ পঠিয়াবলৈ অস্বীকাৰ কৰাৰ পিছত পিচিবিয়ে বিকল্পৰ প্ৰস্তাৱ দিবলৈ বাধ্য হৈছিল। পিচিবিয়ে এটা হাইব্ৰিড মডেলৰ প্ৰস্তাৱ দিছিল য’ত ভাৰতে ইউ.এ.ই.ত তেওঁলোকৰ খেল খেলিব আৰু পাকিস্তানে ঘৰুৱা খেল আয়োজন কৰিব। এচিচিৰ এক সূত্ৰই জনোৱা অনুসৰি, ‘নজম চেঠী (পিচিবিৰ অধ্যক্ষ) ডুবাইত বিষয়টোৰ সমৰ্থন বিচাৰি আছিল কিন্তু তেওঁৰ প্ৰস্তাৱটো কোনোৱে সমৰ্থন কৰা নাছিল। তেওঁ ভাৰতৰ খেলৰ বাহিৰে সকলো খেলৰ বাবে পাকিস্তানৰ কৰাচী বা লাহোৰৰ বিকল্প দিছিল। শ্ৰীলংকা সদায় বিচিচিআইৰ সৈতে আছিল আৰু এতিয়া বাংলাদেশ ক্ৰিকেট ব’ৰ্ডেও চেঠীৰ প্ৰস্তাৱৰ বিৰোধিতা কৰিছে।’ এচিচিয়ে সদায় কৈ আহিছে যে ‘হাইব্ৰিড মডেল’ নীতিগতভাৱে গ্ৰহণযোগ্য নহয় আৰু ইয়াৰ বাবে বাজেট গৃহীত কৰিব নোৱাৰি। এয়া কেৱল পাকিস্তানক আতিথ্য দিয়াৰ বিষয়ে নহয়। ভাৰত আৰু পাকিস্তান এটা গোটত আছে আৰু এনে পৰিস্থিতিত, তৃতীয় দলটোৱে ডুবাই আৰু পাকিস্তানৰ এখন চহৰৰ মাজত ভ্ৰমণ কৰিব লাগিব। পাকিস্তানে শেহতীয়াকৈ দেশখনত নিৰাপত্তা ব্যৱস্থাৰ বৰ্ধিত ব্যয়ৰ প্ৰতি লক্ষ্য ৰাখি পাকিস্তান ছুপাৰ লীগৰ খেলসমূহ ইউএইলৈ স্থানান্তৰ কৰাৰ সিদ্ধান্ত লৈছে। আৰু তেওঁলোকৰ সিদ্ধান্তই এছিয়া কাপ আয়োজনত বাধা উৎপন্ন কৰিছে।
