অন্ধ্ৰ প্ৰদেশ উচ্চ ন্যায়ালয়ত পুনৰ মুখথেকেচা কাৰাবন্দী প্ৰাক্তন মুখ্যমন্ত্ৰী চন্দ্ৰবাবু নাইডুৰ। বিভিন্ন গোচৰত নাইডুৱে দাখিল কৰা তিনিখন জামিন আবেদন নাকচ উচ্চ ন্যায়ালয়ৰ।
অন্ধ্ৰ প্ৰদেশৰ প্ৰাক্তন মুখ্যমন্ত্ৰী তথা তেলেগু দেশম পাৰ্টিৰ মুৰব্বী চন্দ্ৰবাবু নাইডুক ৩৭১ কোটি টকাৰ দক্ষতা বিকাশ কেলেংকাৰিত গ্ৰেপ্তাৰ কৰা হৈছিল। যোৱা ৯ ছেপ্টেম্বৰৰ পুৱা প্ৰায় ৬ বজাত জ্ঞানপুৰমত বাছত শুই থকা অৱস্থাত তেওঁক গ্ৰেপ্তাৰ কৰে ৰাজ্যৰ অপৰাধ অনুসন্ধান বিভাগে। চি আই ডিৰ দাবী, নাইডুৰ নেতৃত্বত শ্বেল কোম্পানীৰ জৰিয়তে ব্যক্তিগত প্ৰতিষ্ঠানলৈ চৰকাৰী ধন হস্তান্তৰ কৰাৰ ষড়যন্ত্ৰ ৰচনা কৰা হৈছিল।
শুকুৰবাৰে নন্দিয়াল জিলাৰ বানাগনাপল্লীত নাইডুৱে এখন ৰাজহুৱা সভা অনুষ্ঠিত কৰিছিল। ইয়াৰ পিছত বাছত জিৰণি লৈ আছিল নাইডু। শনিবাৰে পুৱা প্ৰায় ৩:৩০ বজাত তেওঁক গ্ৰেপ্তাৰ কৰিবলৈ চি আই ডি উপস্থিত হয় যদিও দলৰ কৰ্মী আৰু নেতাই গাড়ীখন ঘেৰাও কৰে। ইয়াৰ বাবে চি আই ডিয়ে তেওঁক গ্ৰেপ্তাৰ কৰিবলৈ কঠোৰ পৰিশ্ৰম কৰিবলগীয়া হৈছিল।
অলপতে অনন্তপুৰ জিলাৰ ৰায়দুৰগামত এখন সভাত নাইডুৱে কৈছিল যে অতি সোনকালে তেওঁক আক্ৰমণ বা গ্ৰেপ্তাৰ কৰা হ’ব পাৰে। চি আই ডিৰ অৰ্থনৈতিক অপৰাধ শাখাৰ উপ-আৰক্ষী অধীক্ষক এম ধনঞ্জয়ুডুৱে কয় যে জামিনহীন ধাৰাত গ্ৰেপ্তাৰ কৰা হৈছে প্ৰাক্তন মুখ্যমন্ত্ৰীগৰাকীক। দুৰ্নীতি নিবাৰক ব্যুৰোৱে ২০১৮ চনত এই কেলেংকাৰিৰ অভিযোগ উত্থাপন কৰিছিল। বৰ্তমান চৰকাৰৰ তদন্তৰ পূৰ্বে জি এছ টি চোৰাংচোৱা শাখা আৰু আয়কৰ বিভাগেও এই কেলেংকাৰিৰ তদন্ত কৰি আছিল।
