ঋতু পৰ্ণ শৰ্মা, নগাঁও: চলিত বৰ্ষৰ পহিলা মাঘৰ দিনটোত অনুষ্ঠিত নহয় আঁহতগুৰিৰ ঐতিহাসিক ম’হযুঁজ । এই কথা সদৰী কৰিছে আঁহতগুৰি ম’হযুঁজ সমিতিয়ে । ক’ভিডজনক পৰিস্থিতৰ প্ৰতি লক্ষ্য ৰাখি ভোগালী বিহুৰ পৰম্পৰা ৰক্ষা কৰিব পৰা নহ’ব বুলি সমিতিয়ে জনাইছে । সমিতিৰ বিষয়ববীয়াই সংবাদ মাধ্যমক জনোৱা মতে চলিত বৰ্ষত কোনো কাৰণতে আঁহতগুৰিত ম’হযুঁজ অনুষ্ঠিত নহয় । আমাৰ দুখ লাগিছে । কিয়নো ইয়াত অনানুষ্ঠনিকভাৱে ৭০ বছৰ ধৰি আৰু আনুষ্ঠানিকভাৱে ৫০বছৰ ম’হযুঁজ অনুষ্ঠিত হৈ আহিছে । এইবেলি আঁহতগুৰি ম’হযুঁজৰ সোণালী জয়ন্তী আছিল । ক’ভিড পৰিস্থিতিৰ বাবে ম’হযুঁজৰ সকলো কাৰ্যসূচী বাতিল কৰা হৈছে । ষ্মৰ্তব্য যে আঁহতগুৰিৰ ম’হযুঁজ উপলক্ষে প্ৰতিবছৰে পহিলা মাঘৰ দিনটোৰ উপৰি ২৬ জানুৱাৰীত বেজবৰুৱা ক্ষেত্ৰখন লোকে লোকাৰণ্য হৈ পৰিছিল । বিভিন্ন ধৰ্ম,জাতি,সম্প্ৰদায়ৰ লোকৰ অংশ গ্ৰহণেৰে ম’হযুঁজস্থলীখন সম্প্ৰীতিৰ লীলাভূমিত পৰিণত হৈছিল । ৰাজ্যখনৰ বিভিন্ন প্ৰান্তৰ লোকৰ লগতে দেশী-বিদেশী পৰ্যটকৰ বাবেও অন্যতম আৰ্কষণ হৈ পৰছিল আঁহতগুৰিৰ ম’হযুঁজ । বিগত কেইটামান বছৰ ন্যায়লয়ৰ কঠোৰ নিষেধাজ্ঞা হেতুকে ম’হযুঁজখন সমিতিৰ উদ্যোগত অনুষ্ঠিত হোৱা নাছিল । ইয়াৰ বিপৰীতে স্থানীয় ম’হৰ গৰাকী আৰু গোৱালসকলৰ উদ্যোগতহে ম’হযুঁজ অনুষ্ঠিত কৰা হৈছিল । চলিত বৰ্ষত তেওঁলোকৰ উদ্যোগত ইতিহাসপ্ৰসিদ্ধ আঁহতগুৰিৰ ম’হযুঁজৰ সোণালী জয়ন্তী আয়োজন কৰা হৈছিল যদিও ক’ভিড পৰিস্থিতিয়ে হেঙাৰ হৈ ঠিয় দিলে । সুদীৰ্ঘ ৭০বছৰৰ মূৰত এইবাৰ উকা হৈ ৰ’ব আঁহতগুৰিৰ বেজবৰুৱা ক্ষেত্ৰ নামৰ পথাৰখন । অৱশ্যে আঁহতগুৰিৰ ৰাইজ আৰু ম’হযুঁজ সমিতিয়ে চলিত বৰ্ষৰ ম’হযুঁজ অনুষ্ঠিত নহয় বুলি ঘোষণা কৰিলেও ম’হৰ গৰাকী আৰু গোৱালসকলে এই সন্দৰ্ভত কি সিদ্ধান্ত গ্ৰহণ কৰে সেয়া এতিয়াও জানিব পৰা হোৱা নাই ।
