অৰুণাচল প্ৰদেশৰ টিৰাপ জিলাত আলফা স্বাধীনৰ কমেও দুজন কেডাৰক নিৰাপত্তা বাহিনীয়ে আটক কৰিছে।
অৰুণাচল প্ৰদেশৰ টিৰাপ জিলাৰ নোগ্লো গাঁৱত ভাৰত-ম্যানমাৰ সীমান্তৰ সমীপৰ পৰা আলফা স্বাধীনৰ কেডাৰ দুজনক আটক কৰা হয়।
আটক কৰা কেডাৰ দুজনৰ নাম সুৰজিৎ গগৈ আৰু শ্যামল বৰুৱা।
সূত্ৰ অনুসৰি আলফা স্বাধীনৰ দুয়োজন কেডাৰে ম্যানমাৰ সীমান্তৰ পৰা লুকাই চুৰকৈ ভাৰতত সোমাবলৈ চেষ্টা কৰাৰ সময়ত নিৰাপত্তাৰক্ষীয়ে আটক কৰে।
আলফাৰ দুয়োজন কেডাৰক ম্যানমাৰস্থিত সংগঠনটোৰ শিবিৰৰ পৰা ভাৰতলৈ পঠোৱা হৈছিল বুলি সূত্ৰসমূহে আৰু জনাইছে।
ইফালে, আটক কৰা কেডাৰ দুয়োজনকে পৰৱৰ্তী জেৰাৰ বাবে স্থানীয় আৰক্ষীক গতাই দিয়া হৈছে।
উল্লেখ্য যে, সুৰজিৎ গগৈ আৰু শ্যামল বৰুৱাই আলফাৰ শিৱিৰৰ পৰা পলায়ন কৰা বুলি খবৰ প্ৰকাশ পাইছিল।
আলফা নেতৃত্বই কেডাৰ দুজনক দেখা মাত্ৰেই গুলীওৱাৰ নিৰ্দেশ দিয়া বুলিও বাতৰি প্ৰকাশ পাইছে।
