বঙাইগাঁও জিলাৰ অভয়াপুৰীত সোমবাৰে নিশা সংঘটিত এক ভয়ংকৰ পথ দুৰ্ঘটনাত প্ৰাণ হেৰুৱায় এজন লোকে। সোণাখুলিত এক ইটা কঢ়িওৱা দ্ৰুতবেগী ট্ৰাকে এজন বাইক আৰোহীক মহতিয়াই নিয়াত নিহত হয় বাইক আৰোহী ব্যক্তিজন। নিহত ব্যক্তিজনক উত্তৰ শালমাৰা উজানপাৰাৰ শিৱচৰণ ৰায় বুলি জানিব পৰা গৈছে।
জানিব পৰা মতে, সৃজনগ্ৰামৰ চুকানী গাঁৱৰ পৰা এগৰাকী ব্যক্তিৰ সৈতে স্কুটীত নিজ ঘৰলৈ গৈ আছিল দুয়ো৷ টৰটৰীয়া পাহাৰৰ নামনিত বিপৰীত দিশৰ পৰা ট্ৰাক এখন অহাৰ সময়তে নিয়ন্ত্ৰণ হেৰুৱাই বাগৰি পৰে দুই স্কুটী আৰোহী৷ দুৰ্ঘটনাটোত পিছত বহি থকা শিৱচৰণ ৰায় পথৰ ওপৰত বাগৰি পৰাত ট্ৰাকে মহতিয়াই নিয়ে৷ ফলত থিতাতে নিহত হয় শিৱচৰণ ৰায়।
আনগৰাকী স্কুটী আৰোহী সৌভাগ্যক্ৰমে ৰক্ষা পৰে বুলি জানিব পৰা গৈছে। দুৰ্ঘটনা সংঘটিত হোৱাৰ পিছতে ঘটনাস্থলী এৰি পলায়ন কৰে ট্ৰাক চালকজন৷ দুৰ্ঘটনাৰ পিছতেই ঘটনাস্থলীত বৰঘোলা আৰক্ষী উপস্থিত হৈছে।
