ডিজিটেল ডেস্কঃ কিছু সপ্তাহ পূৰ্বে উত্তৰ প্ৰদেশৰ এখন জিলা চিকিৎসালয়ৰ দৃশ্য দেখি সমগ্ৰ দেশ স্তম্ভিত হৈ পৰিছিল। চিকিৎসাধীন ৰোগীজনৰ কাষৰ বিচনাত পৰি থকা দেখা গ’ল এটা বাটৰ কুকুৰ। এই ঘটনাত বিতৰ্কৰ সৃষ্টি হৈছিল। আন এখন বিজেপি শাসিত ৰাজ্য মধ্য প্ৰদেশতো একেধৰণৰ ঘটনাৰ সাক্ষী হৈ আছে। ৰাজ্যৰ শ্বাহপুৰা চৰকাৰী স্বাস্থ্য কেন্দ্ৰৰ ভিডিঅ’ ভাইৰেল হৈ পৰিছে। তাত একাধিক বিচনাত পৰি থকা দেখা গ’ল পথৰ কুকুৰ। অভিযোগ অনুসৰি ইয়াৰ পূৰ্বেও এনেধৰণৰ ঘটনা দেখা গৈছে। অৱশ্যে কোনো ব্যৱস্থা গ্ৰহণ নকৰিলে কৰ্তৃপক্ষই।
শ্বাহপুৰাৰ বাসিন্দা সিদ্ধাৰ্থ জৈনে দেওবাৰে পুৱা প্ৰায় ২ বজাত অসুস্থ পত্নীৰ সৈতে স্বাস্থ্য কেন্দ্ৰলৈ অহাৰ অভিযোগ উত্থাপন কৰে। যদিও তেতিয়া স্বাস্থ্য কেন্দ্ৰটোত চিকিৎসক বা আন কৰ্মচাৰী নাছিল। কিন্তু এটাতকৈ অধিক বিচনাত কুকুৰ পৰি থকা দেখিলে। লগতে ৱাৰ্ডত জাবৰৰ থোপা থকা বুলিও অভিযোগ কৰে। লগতে তেওঁ কয় যে দিনৰ ভাগতো স্বাস্থ্যকেন্দ্ৰত চিকিৎসকৰ সুবিধা নাথাকে। ফলত অঞ্চলটোত স্বাস্থ্যকেন্দ্ৰ থাকিলেও স্বাস্থ্যসেৱাৰ নামত স্থানীয় ৰাইজক প্ৰতাৰণা কৰা হৈছে।
প্ৰকৃত ভাইৰেল ভিডিঅ’টোত এটা লেতেৰা ৱাৰ্ডত দুখন ৰোগীৰ বিচনাত শান্তিৰে শুই থকা দেখা গৈছে দুটা বিপথগামী কুকুৰ। কোনো চিকিৎসালয়ৰ কৰ্মচাৰী বা চিকিৎসক বিচাৰি পোৱা নগ’ল। ইফালে স্বাস্থ্য কেন্দ্ৰটোৰ ভিডিঅ’ ভাইৰেল হৈ পৰে ছ’চিয়েল মিডিয়াত। জিলা ভাৰপ্ৰাপ্ত মুখ্য স্বাস্থ্য বিষয়া ডাঃ সঞ্জয় মিশ্ৰই ব্লক চিকিৎসা বিষয়াক ২৪ ঘণ্টাৰ ভিতৰত উত্তৰ দিবলৈ কয়। অভিযোগ প্ৰমাণিত হ’লে উপযুক্ত শাস্তি প্ৰদান কৰা হ’ব বুলিও তেওঁ কয়।
প্ৰসংগক্ৰমে কিছুদিন পূৰ্বে উত্তৰ প্ৰদেশৰ আজমগড়ৰ মণ্ডলীয়া জিলা চিকিৎসালয়তো অনুৰূপ ঘটনা সংঘটিত হৈছিল। ভাইৰেল ভিডিঅ’টোত চিকিৎসাধীন ৰোগীসকল চিকিৎসালয়ৰ কোঠাত পৰি আছে। সেই কোঠাটোৰ খালী বিচনাখনত এটা বিপথগামী কুকুৰ পৰি আছিল। আৰু কুকুৰটোৰ কাষৰ বিচনাত আন এজন ৰোগী চিকিৎসা কৰি আছে। ভিডিঅ’ ভাইৰেল হোৱাৰ পিছতে ৰোগীজনৰ পৰিয়ালৰ লোকে চিকিৎসালয় কৰ্তৃপক্ষৰ গাফিলতিৰ অভিযোগ উত্থাপন কৰে। ইয়াৰ পূৰ্বে এই চিকিৎসালয়ত এজন মৃত ৰোগীৰ মৃতদেহ লৈ ঘূৰি ফুৰা দেখা গৈছিল কুকুৰটোক।
উল্লেখ্য যে, কিছুদিন পূৰ্বে অসমৰো নলবাৰীৰ শ্বহীদ মুকুন্দ কাকতি অসামৰিক চিকিৎসালয়ৰ চিকিৎসকৰ টেবুলত আৰু ৰোগী শোৱা বিচনাত কুকুৰৰ সুখনিন্দ্ৰাৰ এখন ফটো ভাইৰেল হৈ পৰিছিল।
