৩৭০ অনুচ্ছেদ সন্দৰ্ভত উচ্চতম ন্যায়ালয়ে প্ৰদান কৰিছে গুৰুত্বপূৰ্ণ ৰায়। আদালতে কয় যে যুদ্ধৰ পিছত উদ্ভৱ হোৱা পৰিস্থিতিৰ প্ৰতি লক্ষ্য ৰাখি ৩৭০ অনুচ্ছেদৰ ব্যৱস্থা কৰা হৈছে। এয়া অস্থায়ী আৰু ইয়াক সলনি কৰিব পৰা যাব। শুদ্ধ পদ্ধতিৰে কেন্দ্ৰীয় চৰকাৰে বাতিল কৰাৰ সিদ্ধান্ত গ্ৰহণ কৰে। জম্মু-কাশ্মীৰ ভাৰতৰ এক অবিচ্ছেদ্য অংগ। ভাৰতৰ সংবিধানৰ ১ আৰু ৩৭০ অনুচ্ছেদৰ পৰা এই কথা স্পষ্ট। উচ্চতম ন্যায়ালয়ে নিৰ্বাচন আয়োগক আগতীয়াকৈ নিৰ্বাচন অনুষ্ঠিত কৰিবলৈ আৰু কেন্দ্ৰীয় চৰকাৰক জম্মু-কাশ্মীৰৰ ৰাজ্যিক অৱস্থা পুনৰ ঘূৰাই আনিবলৈ নিৰ্দেশ দিছে।
সহজ ভাষাত ক’বলৈ গ’লে কেন্দ্ৰীয় চৰকাৰে ৩৭০ ধাৰা আঁতৰোৱাৰ সিদ্ধান্তক বৈধ বুলি বিবেচনা কৰিছে আদালতে। এই বিশেষ মৰ্যাদা বিলুপ্ত কৰাটো কেন্দ্ৰীয় চৰকাৰৰ অধীনস্থ বুলি আদালতে মানি লয়। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত পাঁচজনীয়া বিচাৰপীঠে এই বিষয়ত সিদ্ধান্ত গ্ৰহণ কৰে। আদালতে জম্মু-কাশ্মীৰ ৰাজ্যিক বিধানসভাৰ নিৰ্বাচন অনুষ্ঠিত কৰাৰ নিৰ্দেশ জাৰি কৰি কয় যে ৰাজ্যিক স্থান পুনৰুদ্ধাৰ ক্ষিপ্ৰতাৰে কৰিব লাগে।
মুখ্য ন্যায়াধীশগৰাকীয়ে কয় যে নিৰ্বাচন বেছি দিন স্থগিত ৰাখিব নোৱাৰি। উচ্চতম ন্যায়ালয়ে নিৰ্বাচন আয়োগক নিৰ্দেশ দিছে জম্মু-কাশ্মীৰত ২০২৪ চনৰ ৩০ ছেপ্টেম্বৰৰ ভিতৰত নিৰ্বাচন অনুষ্ঠিত কৰিবলৈ। ইয়াৰ লগতে উচ্চতম ন্যায়ালয়ৰ পাঁচজনীয়া ন্যায়াধীশৰ বিচাৰপীঠে কেন্দ্ৰীয় চৰকাৰক পুনৰ জম্মু-কাশ্মীৰক ৰাজ্যৰ মৰ্যাদা দিবলৈ কয়। এই ক্ষেত্ৰত পলম নকৰিবলৈ কয় মুখ্য ন্যায়াধীশে।
মুখ্য ন্যায়াধীশে মানি লয় যে ভাৰতৰ সৈতে একত্ৰিত হোৱাৰ পিছত জম্মু-কাশ্মীৰ সাৰ্বভৌম ৰাষ্ট্ৰ হোৱা বন্ধ হৈ গ’ল। জম্মু-কাশ্মীৰত এতিয়া সংবিধান সভা নাই। ৰাজ্যখনৰ যুদ্ধৰ বাবে ৩৭০ অনুচ্ছেদ অন্তৱৰ্তীকালীন ব্যৱস্থা হিচাপে কাৰ্যকৰী হোৱা বুলি স্বীকাৰ কৰে মুখ্য ন্যায়াধীশ ডি ৱাই চন্দ্ৰচুড়ে। চিজেআইয়ে স্বীকাৰ কৰে যে এইটো এটা অস্থায়ী ব্যৱস্থা। ১ আৰু ৩৭০ অনুচ্ছেদৰ অধীনত উচ্চতম ন্যায়ালয়ৰ পাঁচজনীয়া বিচাৰপীঠে জম্মু-কাশ্মীৰ ভাৰতৰ অবিচ্ছেদ্য অংগ বুলি মানি লৈছিল।
আদালতে কয় যে সংবিধান সভাৰ ভংগ হোৱাৰ পাছতো ৰাষ্ট্ৰপতিৰ কৰ্তৃত্ব অক্ষত আছে আৰু এই বিষয়ত ৰাষ্ট্ৰপতিয়ে আদেশ দিয়াটো একেবাৰে সঠিক। উদাহৰণস্বৰূপে, সংবিধান সভাৰ পৰামৰ্শ ৰাষ্ট্ৰপতিৰ বাবে বাধ্যতামূলক নহয় বুলি আদালতে মানি লৈছিল। ৩৭০ অনুচ্ছেদ আঁতৰোৱাৰ সিদ্ধান্ত জম্মু-কাশ্মীৰৰ একত্ৰীকৰণৰ বাবে লোৱা বুলি চিজেআইয়ে প্ৰকাশ কৰে। চিজেআইয়ে মানি লয় যে ৩৭০ ধাৰা আঁতৰোৱাৰ বাবে বৈধ প্ৰক্ৰিয়া গ্ৰহণ কৰা হৈছে।
উচ্চতম ন্যায়ালয়ৰ সিদ্ধান্তৰ পূৰ্বে জম্মু-কাশ্মীৰত নিৰাপত্তা কটকটীয়া কৰা হৈছিল। দীৰ্ঘদিনীয়া শুনানিৰ অন্তত ৫ ছেপ্টেম্বৰত পাঁচজনীয়া বিচাৰপীঠে নিজৰ সিদ্ধান্ত সংৰক্ষণ কৰি ৰাখিছিল। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত থকা বিচাৰপীঠখনত ন্যায়াধীশ এছ কে কৌল, সঞ্জীৱ খান্না, বি আৰ গাভাই আৰু সূৰ্য কান্তই অংশ লৈছিল। পাঁচজনীয়া বিচাৰপীঠৰ সন্মুখত ২৩খন আৱেদন দাখিল কৰিছিল, যাৰ ওপৰত আদালতে সিদ্ধান্ত দিছে।
