শিৱসাগৰ চহৰৰ নিজৰ বাসগৃহত এজন লোকে নিজে সেৱন কৰাৰ পূৰ্বে নিজৰ সন্তান দুটাক বিষ খুৱাই হত্যাৰ চেষ্টা কৰাৰ অভিযোগ উত্থাপন হৈছে।
বুধবাৰে সংঘটিত হোৱা এই চাঞ্চল্যকৰ ঘটনাটো বৃহস্পতিবাৰে পোহৰলৈ আহে।
মৃদুল সন্দিকৈ নামৰ লোকজন শিৱসাগৰ নগৰৰ উপকণ্ঠ অঞ্চলৰ বগীডল অঞ্চলৰ বাসিন্দা।
খবৰ অনুসৰি, যেতিয়া চুবুৰীয়াই ঘটনাটোৰ বিষয়ে জানিব পাৰিলে, তেতিয়া সন্দিকৈ আৰু তেওঁৰ দুটা সন্তানক ততাতৈয়াকৈ চিকিৎসালয়লৈ প্ৰেৰণ কৰা হয়।
কিন্তু তেওঁৰ ৬ বছৰীয়া পুত্ৰ পিণ্টু সন্দিকৈক চিকিৎসকে মৃত বুলি ঘোষণা কৰে। ইফালে ইতিমধ্যে মৃত্যু ঘটিছে মৃদুল সন্দিকৈৰো।
শিৱসাগৰ জিলাৰ আৰক্ষী অধীক্ষক শুভ্ৰজ্যোতি বৰাই জনোৱা মতে, লোকজনৰ আনজন ১০ বছৰ বয়সৰ পুত্ৰৰ অৱস্থা সংকটজনক, আৰু ডিব্ৰুগড়ৰ অসম চিকিৎসা মহাবিদ্যালয় হাস্পতালত চিকিৎসাধীন হৈ আছে।
প্ৰাথমিক তদন্ত অনুসৰি আৰক্ষীয়ে জানিব পাৰিছে যে লোকজনৰ পত্নীৰ সৈতে কিছু ঘৰুৱা সমস্যা আছিল।
যোৱা কেইমাহমানৰ পৰা পত্নী-কন্যাই পৃথকে পৃথকে বসবাস কৰি আছিল আৰু আৰক্ষীয়ে সন্দেহ কৰিছে যে পাৰিবাৰিক সংঘাতৰ ফলত হয়তো এই দুৰ্ভাগ্যজনক ঘটনা সংঘটিত হৈছে।
