শিলচৰত আৰক্ষীৰ জিম্মাৰ পৰা পলায়নৰ চেষ্টা কৰি গুলিবিদ্ধ হয় এজন কুখ্যাত ডকাইত। ডকাইতজনে পলায়নৰ চেষ্টা চলোৱাত আৰক্ষীয়ে গুলিচালনা কৰে। এই ঘটনাত আৰক্ষী বিষয়া সুব্ৰত কুমাৰ সেন আৰু এজন কনিষ্টবল প্ৰদীপ দাসো আঘাতপ্ৰাপ্ত হয়।
ধৃত ডকাইতটোক তাজুদ্দিন চৌধুৰী বুলি চিনাক্ত কৰা হৈছে। আঘাতপ্ৰাপ্ত ডকাইতটোক পিছত শিলচৰ চিকিৎসা মহাবিদ্যালয় আৰু চিকিৎসালয়ত ভৰ্তি কৰোৱা হৈছিল।
তাজুদ্দিনক মঙলবাৰে আৰক্ষীয়ে সোনাই ধনেশৰীৰ বাসগৃহৰ পৰা গ্ৰেপ্তাৰ কৰিছিল। জেৰাৰ সময়ত তাজুদ্দিনে স্বীকাৰ কৰিছিল যে চালচাপ্ৰাৰ সুৰতাৰাৰ ওচৰৰ এটা ঠাইত কিছুমান মৰাণাস্ত্ৰ লুকুৱাই ৰখা হৈছে। বুধবাৰে নিশা, এএছপি সেনৰ নেতৃত্বত জিলা আৰক্ষীৰ এটা দলে অস্ত্ৰ সংগ্ৰহৰ বাবে ডকাইতটোক লৈ যায়। কিন্তু তাতে আৰক্ষীৰ দলটোক আক্ৰমণ কৰি পলায়নৰ চেষ্টা কৰে।
সূত্ৰই জনোৱা মতে, আৰক্ষীয়ে ঘটনাস্থলীৰ পৰা এটা পিষ্টল আৰু তিনিটা সজীৱ কাৰ্ট্ৰিজ উদ্ধাৰ কৰে।
