আন্তৰ্জাতিক শ্ৰমিক সংস্থা (আইএলঅ’) আৰু মানৱ উন্নয়ন প্ৰতিষ্ঠান (আইএইচডি)ৰ দ্বাৰা যুটীয়াভাৱে প্ৰকাশিত ইণ্ডিয়া এমপ্লয়মেণ্ট ৰিপ’ৰ্ট ২০২৪ অনুসৰি ভাৰতৰ ৮৩ শতাংশ যুৱ প্ৰজন্ম বৰ্ধিত নিবনুৱা হাৰৰ সৈতে যুঁজি আছে। প্ৰতিবেদনখনে এক সম্পৰ্কিত প্ৰৱণতাৰ ওপৰত গুৰুত্ব আৰোপ কৰিছে, য’ত মুঠ নিবনুৱা যুৱক-যুৱতীৰ ভিতৰত কমেও মাধ্যমিক শিক্ষা লাভ কৰা শিক্ষিত যুৱক-যুৱতীৰ অনুপাত ২০২০ চনৰ ৩৫.২ শতাংশৰ পৰা ২০২২ চনত ৬৫.৭ শতাংশলৈ বৃদ্ধি পাইছে। উচ্চ শিক্ষাত নামভৰ্তি বৃদ্ধি হোৱা স্বত্বেও, শিক্ষাৰ মানদণ্ডৰ উদ্বেগ অব্যাহত আছে। প্ৰতিবেদন অনুসৰি বিদ্যালয় আৰু উচ্চ শিক্ষাৰ স্তৰত গুৰুত্বপূৰ্ণ শিক্ষণত ঘাটি দেখা গৈছে। অধ্যয়ন অনুসৰি, ২০০০ আৰু ২০১৯ চনৰ ভিতৰত নিযুক্তি বৃদ্ধি পাইছিল কিন্তু ক’ভিড- ১৯ মহামাৰী বছৰবোৰত ইয়াৰ সংখ্যা হ্ৰাস পাবলৈ ধৰে। বিহাৰ, উত্তৰ প্ৰদেশ, উৰিষ্যা, মধ্য প্ৰদেশ, ঝাৰখণ্ড আৰু ছত্তীশগড়ৰ দৰে ৰাজ্যসমূহে বিগত বছৰবোৰত নিবনুৱাক নিযুক্তিত ভাল ফলাফল দেখুৱাব পৰা নাই, যাৰ বাবে এই ৰাজ্য কেইখনত আন ৰাজ্যৰ তুলনাত নিবনুৱা সৰ্বাধিক।
