অসম কেবিনেটে শুকুৰবাৰে ৰাজ্যৰ চৰকাৰী চিকিৎসা মহাবিদ্যালয়সমূহৰ অধ্যাপকসকলৰ অৱসৰৰ বয়স ৬৫ বছৰৰ পৰা ৭০ বছৰলৈ বৃদ্ধি কৰাৰ সিদ্ধান্ত গ্ৰহণ কৰে।
চৰকাৰী মুখপাত্ৰ তথা জলসম্পদ মন্ত্ৰী পীযুষ হাজৰিকাই সাংবাদিকৰ আগত কয় যে শৈক্ষিক আৰু চিকিৎসা সেৱাৰ বাবে অভিজ্ঞ চিকিৎসকৰ উপলব্ধতা বৃদ্ধি কৰাৰ লক্ষ্যৰে এই পদক্ষেপ গ্ৰহণ কৰা হৈছে।
২০২২-২৩ বৰ্ষৰ বাবে বিনামূলীয়া ড্ৰাগছ আৰু কনজুমেবলছ আঁচনি ৰূপায়ণৰ বাবে কেবিনেটে ১৩৬.৮ কোটি টকা অনুমোদন কৰাৰ সিদ্ধান্ত গ্ৰহণ কৰে, যাৰ ফলত চৰকাৰী স্বাস্থ্য সুবিধাসমূহত বিনামূলীয়াকৈ অত্যাৱশ্যকীয় ঔষধ, অস্ত্ৰোপচাৰ, বীজাণুনাশক, ৰাসায়নিক আৰু উপভোগ্য সামগ্ৰীৰ নিৰৱচ্ছিন্ন উপলব্ধতা নিশ্চিত হ’ব বুলিও তেওঁ কয়।
হিন্দুস্তান পেপাৰ কৰ্প’ৰেশ্যন লিমিটেড (এইচপিচিএল)ৰ ৬৬জন প্ৰাক্তন কৰ্মচাৰীক খালী হৈ থকা তৃতীয় আৰু -চতুৰ্থ শ্ৰেণীৰ পদত উচ্চ বয়সৰ সীমা শিথিল কৰি বিশেষ নিযুক্তি অভিযানৰ জৰিয়তে পুনৰ নিয়োগ কৰাৰ সিদ্ধান্তত অনুমোদন জনোৱা বুলিও হাজৰিকাই কয়।
