বৰপেটা ৰাষ্ট্ৰীয় ঘাইপথৰ পৰা যোৱা 17 অক্টোবৰৰত কাঠ ভৰ্তি ট্ৰাক সহ নিৰুদ্দেশ হোৱাৰ দহ দিন পাছত বৰপেটাৰোড আৰক্ষীয়ে কাঠ সহ ট্ৰাকখনৰ চালকক গ্ৰেপ্তাৰ কৰিবলৈ সক্ষম হৈছে ৷ আৰক্ষীয়ে আটক কৰা ট্ৰাক চালকজনৰ নাম আছাদ আলী বুলি জানিব পৰা গৈছে ৷ ঘটনাৰ বিৱৰণি মতে বৰপেটাৰ বহৰিৰ মহিদুল শ্বেইখ নামৰ এজন কাঠ বেপাৰীয়ে কাজলগাওৰ DFO কাৰ্যালয়ৰ পৰা ৮২ টা বনচোম আৰু খোকন কাঠৰ পিচ অক্সনত ক্ৰয় কৰিছিল ৷ উক্ত কাঠ সমূহ কাজলগাওঁৰ পৰা বৰপেটাৰ বহৰিলৈ কঢ়িয়াই আনিবলৈ কাঠ বেপাৰী মহিদুল শ্বেইখে AS -09C-7632 নম্বৰ ট্ৰাকখন ভাৰাত লৈছিল ৷ উক্ত কাঠ সমূহ কঢ়িয়াই আনি থাকোতে 17 অক্টোবৰৰ নিশা প্ৰায় 11-30 মান বজাত বৰপেটাৰোডৰ বেঁকীৰ পাৰৰ পৰা চালক আছাদ আলীয়ে কাঠ সহ ট্ৰাকখনলৈ নিৰুদ্দেশ হৈছিল ৷ প্ৰায় 5 লাখ টকা মূল্যৰ কাঠ সহ ট্ৰাক চালক আছাদ আলীৰ কোনো সন্ধান নাপাই কাঠ বেপাৰী মহিদুল শ্বেইখে বৰপেটাৰোড আৰক্ষী থানাত 23 অক্টোবৰত এখনি এজাহাৰ দাখিল কৰিছিল ৷ সেইমৰ্মে বৰপেটাৰোড আৰক্ষীয়ে তদন্ত চলাই যোৱা 23 অক্টোবৰতেই নিশা বৰপেটাৰোডৰ বিলাসীপাৰাৰ পৰা খালী ট্ৰাকখন উদ্ধাৰ কৰিছিল যদিও কাঠ সমূহ উদ্ধাৰ কৰিব পৰা নাছিল ৷ পাছত যোৱা সোমবাৰে সৰভোগ এটা অঞ্চলৰ পৰা লুকুৱাই ৰখা অৱস্থাত উক্ত কাঠ সমূহ বৰপেটাৰোড আৰক্ষীয়ে উদ্ধাৰ কৰিবলৈ সক্ষম হয় ৷ বৰপেটাৰোড আৰক্ষীয়ে ধৃত ট্ৰাক চালক আছাদ আলীক বৰপেটা আদালতত হাজিৰ কৰাই নিজৰ জিম্মালৈ আনি তদন্ত প্ৰক্ৰিয়া অব্যাহত ৰাখিছে।
