পুনৰ অসম আৰক্ষীৰ এনকাউন্টাৰ। আৰক্ষী জোৱানক মহটিয়াই নিয়া ট্ৰাক চালকলৈ অসম আৰক্ষীৰ গুলী। জানিব পৰা মতে, তদন্তৰ সময়ত ঘটনাস্থলীৰ পৰা পলায়নৰ চেষ্টা কৰিছিল অভিযুক্তই আৰু তেতিয়াই আৰক্ষীয়ে এনকাউন্টাৰ কৰে। এই সমগ্ৰ ঘটনাই তীব্ৰ চাঞ্চল্যৰ সৃষ্টি কৰিছে অঞ্চলটোত। এই মৰ্মান্তিক তথা হৃদয় বিদাৰক ঘটনা সংঘটিত হৈছিল শ্ৰীভূমি জিলাত।উল্লেখ্য যে, শনিবাৰৰ দিনা শ্ৰীভূমি জিলাত সংঘটিত হৈছিল এক মৰ্মান্তিক ঘটনা। ড্ৰাগছ কঢ়িয়াই অনা এখন ট্ৰাকে মহটিয়াই নিছিল কৰ্তব্যৰত আৰক্ষী জোৱানত। শ্ৰীভূমিৰ অসম- ত্ৰিপুৰা সংযোগী ৮ নং ৰাষ্ট্ৰীয় ঘাইপথত সংঘটিত এই ঘটনাৰ ফলত নিহত হৈছিল যোৰহাটৰ উজ্বল বৰা নামৰ আৰক্ষী জোৱানজন। শ্ৰীভূমিৰ পাণহাটীৰ আৰক্ষী নাকা চেকিঙৰ কাষতে সংঘটিত হৈছিল এই ঘটনা। এই দুৰ্ঘটনা সংঘটিত কৰিয়েই পলায়ন কৰিছিল ট্ৰাকৰ চালক।
