নুমলীগড়ৰ কমাৰগাঁও আৰক্ষী থানাৰ অন্তৰ্গত সোণোৱালত ৩৭নং ৰাষ্ট্ৰীয় পথত বৃহস্পতিবাৰে আবেলি এখন বালিভৰ্তি তীব্ৰ বেগী ডাম্পাৰৰ খুন্দাত থিতাতে এগৰাকী মহিলা মৃত্যু হোৱাৰ লগতে আন পাঁচগৰাকী লোক গুৰুতৰভাৱে আহত হয়।
৩৭নং ৰাষ্ট্ৰীয় ঘাইপথৰ সমীপতে এ এছ ২১ জে ৫২৫৬ নম্বৰৰ এখন টিভি এছ মফেডত অহা ব্যৱসায়ীৰ পৰা সামগ্ৰী ক্ৰয় কৰি থকাৰ সময়তে কমাৰগাঁও দিশৰ পৰা অহা এ এছ ০৯ চি ৩৫৫১ এখন তীব্ৰ বেগী ডাম্পাৰে সামগ্ৰী বিক্ৰী কৰা লোকজনৰ লগতে আন তিনিগৰাকী লোকক মহতিয়াই কাষৰ খাৱৈত সোমাই পৰে।
এই দুৰ্ঘটনাত ঘটনাস্থলীতে সোণোৱাল গাঁৱৰ মীনা শইকীয়া (৬৩) নামৰ মহিলাগৰাকী নিহত হোৱাৰ লগতে দুৰ্ঘটনাটোত ব্যৱসায়ী নিকিবুল হুছেইন (৪৫), সোণোৱাল গাঁৱৰ সুনীল শইকীয়া (৪৫), বিনু শইকীয়া (২৫), ডাম্পাৰৰ চালক বিশ্বজিৎ দাস আৰু দুহিতা বাউলী গুৰুতৰভাৱে আহত হয়।
আহতসকলক আৰক্ষীৰ সহযোগত ১০৮ এম্বুলেন্স সেৱাৰ জৰিয়তে বোকাখাত অসামৰিক চিকিৎসালয়লৈ প্ৰেৰণ কৰা হয় যদিও সুনীল শইকীয়া আৰু বিনু শইকীয়াক উন্নত চিকিৎসাৰ বাবে যোৰহাট মেডিকেল কলেজ হাস্পতাললৈ প্ৰেৰণ কৰে।
