তালিবানৰ আফগানিস্তান সম্পূৰ্ণ দখলৰ পিছৰে পৰা তোলপাৰ লাগিছে ভাৰতীয় ৰাজনীতিতো। বাণিজ্যিক দিশৰ পৰাও আফগানিস্তানৰ সংকট ভাৰতৰ বাবে অতি গুৰুত্বপূৰ্ণ বিবেচিত হৈছে। যাৰ পৰিপ্ৰেক্ষিতত অহা ২৬ আগষ্টত এখন সৰ্বদলীয় বৈঠক অনুষ্ঠিত কৰাৰ সিদ্ধান্ত লৈছে বিদেশ মন্ত্ৰণালয়ে। প্ৰধানমন্ত্ৰী নৰেন্দ্ৰ মোদীৰ নিৰ্দেশ মৰ্মে এই বৈঠক অনুষ্ঠিত কৰা হৈছে বুলি সোমবাৰে জানিবলৈ দিয়ে বৈদেশিক পৰিক্ৰমা মন্ত্ৰী এছ জয়শঙ্কৰে। খবৰ অনুসৰি, বৈদেশিক পৰিক্ৰমা মন্ত্ৰী এছ জয়শংকৰে আফগানিস্তান সংকটক লৈ ২৬ আগষ্টৰ পুৱা ১১ বজাত সৰ্বদলীয় বৈঠক আহ্বান কৰিছে। মন্ত্ৰী প্ৰহ্লাদ যোশীয়ে এই বৈঠকখন সমন্বয় কৰিব।
ইফালে, দিল্লীত ৰাষ্ট্ৰসংঘৰ উচ্চায়ুক্তৰ কাৰ্যালয়ৰ সন্মুখত আফগান শৰণাৰ্থীসকলৰ প্ৰতিবাদ অব্যাহত আছে। তেওঁলোকে সকলো আফগানৰ বাবে শৰণাৰ্থীৰ মৰ্যাদা, তৃতীয় দেশৰ বাবে পুনৰ্সংস্থাপনৰ বিকল্প আৰু ভাৰত চৰকাৰৰ পৰা সুৰক্ষা দাবী কৰে। এই প্ৰদৰ্শনত ভাষণ প্ৰদান কৰি ভাৰতৰ আফগান সম্প্ৰদায়ৰ মুৰব্বী আহমেদ জিয়া ঘানিয়ে কয় যে ভাৰতত ২১,০০০ তকৈও অধিক আফগান শৰণাৰ্থী আছে আৰু তেওঁলোকে আফগানিস্তানলৈ ঘূৰি আহিব নিবিচাৰে।
অন্যহাতে খবৰ অনুসৰি, আফগানিস্তানত আৱদ্ধ ভাৰতীয় নাগৰিক আৰু আফগানসকলক স্থানান্তৰ কৰাৰ বাবে ভাৰত চৰকাৰে সকলো প্ৰচেষ্টা চলাই আছে। সংকটটো দূৰ কৰিবলৈ এতিয়া কাবুলৰ পৰা প্ৰতিদিনে দুখন বিমান চলাবলৈ অনুমতি দিয়া হৈছে। ভাৰতে আশ্বাস দিছে যে ই হিন্দু আৰু শিখসকলৰ লগতে আফগানিস্তানত ইয়াৰ মিত্ৰশক্তিক সহায় কৰিব।
