অষ্ট্ৰেলিয়া আৰু ইংলেণ্ডৰ মাজত অনুষ্ঠিত পাঁচখন খেলৰ এছেজ শৃংখলাৰ চতুৰ্থখন টেষ্ট মেচ অমীমাংসিত ভাৱে সমাপ্ত হয়। ইয়াৰ সৈতে, অষ্ট্ৰেলিয়াৰ দলটোৱে এছেজ খিতাপ বজাই ৰাখিছে। আনকি ইংলেণ্ডে পঞ্চম টেষ্ট মেচখন জিকিলেও, তেওঁলোকে শৃংখলাটো ২-২ ত ড্ৰ কৰিবলৈহে পাৰিব। দুয়োখন দেশৰ মাজত যোৱা এছেজ শৃংখলাত অষ্ট্ৰেলিয়া ৪-০ ত বিজয়ী হৈছিল। ডিফেণ্ডিং চেম্পিয়ন হোৱাৰ বাবে ট্ৰফীটো কেংগাৰু দলৰ সৈতে থাকিব। দুয়োটা দলৰ মাজত পঞ্চম খন টেষ্ট মেচ ২৭ জুলাইৰ পৰা ওভালত অনুষ্ঠিত হ’ব। বৰষুণৰ বাবে, পঞ্চম দিনা (২৩জুলাই) মানচেষ্টাৰৰ ওল্ড ট্ৰেফৰ্ড খেলপথাৰত এটাও বল কৰা হোৱা নাছিল। আম্পায়াৰসকলে দীঘলীয়া সময় অপেক্ষা কৰাৰ পিছত পঞ্চম দিনৰ খেল বাতিল কৰাৰ সিদ্ধান্ত লয়। বৰষুণে চতুৰ্থ দিনৰ খেলতো ব্যাঘাত জন্মাই। যদি বৰষুণ নহ’লহেঁতেন, ইংলেণ্ডে এই মেচখন জিকাৰ যথেষ্ট সুযোগ পালেহেঁতেন। অষ্ট্ৰেলিয়াৰ দলটোৱে তেওঁলোকৰ দ্বিতীয় ইনিংছত পাঁচটা উইকেটৰ বিনিময়ত ২১৪ ৰান সংগ্ৰহ কৰিছিল, যাৰ পিছত এটাও বল খেলিব পৰা নাছিল। অষ্ট্ৰেলিয়াৰ দলটো ইংলেণ্ডৰ পৰা ৬১ ৰানত পিছ পৰি আছিল আৰু ইনিংছৰ পৰাজয়ৰ আশংকাত আছিল। কিন্তু বৰষুণে ইংলেণ্ডৰ আশা কঢ়িয়াই আনিছিল। অষ্ট্ৰেলিয়ান দলৰ হৈ দ্বিতীয় ইনিংছত মাৰ্নাছ লাবুচাগেনে ১১১ ৰান সংগ্ৰহ কৰিছিল। ইংলেণ্ডৰ বেটছমেনসকলে এই খেলখনত ‘বেজবল’ ক্ৰিকেটৰ দৃশ্য উপস্থাপন কৰিছিল। ইংলেণ্ডে ১০৭.৪ অভাৰত ৫৯২ ৰান সংগ্ৰহ কৰিছিল আৰু এই সময়ছোৱাত তেওঁলোকৰ ৰানৰ হাৰ আছিল ৫.৪৯। ইংলেণ্ডৰ হৈ অপেনাৰ জেক ক্ৰাউলিয়ে মাত্ৰ ১৮২ টা বলত ১৮৯ ৰান সংগ্ৰহ কৰে, য’ত ২১ টা চাৰি আৰু তিনিটা ছয় অন্তৰ্ভুক্ত আছিল। ক্ৰাউলে প্ৰথমে মঈন আলীৰ সৈতে দ্বিতীয় উইকেটৰ বাবে ১২১ ৰানৰ অংশীদাৰীত্ব কৰে আৰু তাৰ পিছত অভিজ্ঞ বেটছমেন জো ৰুটৰ সৈতে ২০৬ ৰানৰ অংশীদাৰীত্ব কৰে। মঈনে ৮২ টা বলত ৫৪ ৰান সংগ্ৰহ কৰে, যাৰ ভিতৰত আছে সাতটা চাৰি। একে সময়তে, জো ৰুটে ৯৫ টা বলত ৮৪ ৰান সংগ্ৰহ কৰে। ৰুটে তেওঁৰ ইনিংছত ৮ টা চাৰি আৰু এটা ছয় মাৰিছিল। পিছত, জনি বেয়াৰষ্টো (অপৰাজিতভ ৯৯ ৰান) আৰু বেন ষ্টোকছে সুন্দৰ ইনিংছ খেলিছিল। ইংলেণ্ডে প্ৰথম ইনিংছৰ ভিত্তিত ২৭৫ ৰানৰ অগ্ৰগতি লাভ কৰিছিল। উল্লেখ্য যে অষ্ট্ৰেলিয়ান দলৰ প্ৰথম ইনিংছ ৩১৭ ৰানত অন্ত পৰিছিল। মিচেল মাৰ্ছ আৰু মাৰ্নাছ লাবুচাগেনে ৫১ কৈ ৰান সংগ্ৰহ কৰে। একে সময়তে ট্ৰেভিছ হেড (৪৮), মিচেল ষ্টাৰ্ক (অপৰাজিত ৩৬ ৰান ) আৰু ষ্টিভ স্মিথেও (৪১) ৰান সংগ্ৰহ কৰে। ইংলেণ্ডৰ হৈ ক্ৰিছ ৱ’ক্সে সৰ্বাধিক পাঁচটা উইকেট দখল কৰে। অষ্ট্ৰেলিয়াই একেৰাহে চতুৰ্থবাৰৰ বাবে এছেজ ট্ৰফী দখল কৰিছে। ২০১৭-১৮ বৰ্ষৰ শৃংখলাত অষ্ট্ৰেলিয়াই ৪-০ ত জয়লাভ কৰি এছেজ জয় কৰে। তাৰ পিছত ২০১৯ শৃংখলাটো ২-২ ত টাই হৈছিল, যাৰ বাবে এছেজ ট্ৰফী অষ্ট্ৰেলিয়াৰ সৈতে আছিল। ইয়াৰ পিছত, ২০২১-২২ বৰ্ষত অষ্ট্ৰেলিয়াই এছেজ শৃংখলা ৪-০ ত জিকিছিল।
